Бугюнлерде Хумторкъали районну Къоркъмаскъала юртундагъы Магьамматзагьир Баймурзаевни атындагъы школада къуванчлы агьвалат болду. Россияны Игити, милицияны старший лейтенанты, 2005-нчи йылда бандитлени-террорчуланы бир бёлюгю Буйнакск-Унцукул ёлдагъы туннелни атылтмагъа айланагъанда алдын алгъан, атылтма къоймагъан, тек оьзюне оьлюр яра тийген Аскер Аскеровну гьюрметине «Игитни партасы» деген чара оьтдю.
«Игитни партасы» деген бютюнроссия билим берив проектни ишге салгъынча, охувчу яшлар Игитни яшавуна байлавлу материалланы жыйгъан. Школада тарихни, гьалиги заманны игитлерини атларын, оланы къоччакъ ишлерин яш наслу нечик билегенин токъташдырмакъ учун соравлар-ахтарывлар юрютген.
«Игитни партасы» деген проектни мурады – Россияны Игити Аскер Аскеровну эсделигин ва атын асрулар боюнда сакъламакъ. Проект охувчу-ланы тарбиялавда патриот, къылыкъ, излев-ахтарыв янларын къуршай, яшланы яратывчулукъ гьаракатын гючлендире.
Проектни ортакъчылары Россияны Игити А. Аскеровну яшавун ахтаражакъ, ону къоччакъ ишлери юрюлген ерлеге баражакъ, игитликни нечик этмеге болагъаны гьакъда уллулар булан лакъырлашывлар юрютежек.
«Игитни партасыны» чарасында МВД-ни Хумторкъали райондагъы бёлюгюню начальниги Али Къурамагьамматов ортакъчылыкъ этди. «Игитни партасы» деген гьаракатда школаны директору Н. Хункерханова, завучу А. Умарова чыгъып сёйледилер.
«Игитни партасында» яхшы охуйгъанлар, школаны жамият ишлеринде актив кюйде ортакъчылыкъ этегенлер, конкурсланы ва олимпиадаланы алдынлылары олтурмагъа, суратлар чыгъармагъа бола.
Жават ЗАКАВОВ.
СУРАТДА: «Игитни партасы».
