Шолай муаллимлени бириси Хосар Шагьманаевич Хосаровну гьакъында язмагъа сюемен. Бу муаллим – халкъыбызны тарихине бакъгъан якъдагъы сюювю булангъы ва шо сюювню учгъунларын яш наслуну юреклеринде де якъмакъ муратда чалышагъан адам. Шо саялы да, Хосарны ата юрту Гьелиден къайры, Дагъыстанны кёп къумукъ юртларында да таный.
Х.Хосаров Гьели орта школада дарс берегенли 25 йылдан да кёп бола. Шончакъы йылланы боюнда ол кёп сююп танглагъан касбусуна аминлигин гёрсетип ишлей. Хасавюрт педагогика училищени битдиргенли, ата юртундагъы школагъа къайтып, оьз касбусундан айрылмагъан.
Гьелини орта школасында Хосар Шагьманаевич – сынавлу муаллимлени бириси. Оьзю береген физкультура дарсларында ол яшланы къаракъарасыны савлугъун беклешдирив булан тамамланып къалмай. Оьз ишинде муаллим тарбиялав масалагъа да кёп агьамият бере. Неге тюгюл де, санланы савлугъу булан бирге муаллим оьсюп гелеген наслуну ругь якъдан савлугъуну гьайын этмеге борчлу деп гьисап эте. Ону пикрусуна гёре, оьзюню ата юртуну тарихин билмей туруп, милли тарихини оьсюв ёлларын уьйренмей туруп, миллетине бакъгъан якъда яшланы сюювюн артдырып болмай. Муаллим яшлар оьз тарихин билсин учун, оьзю де гьаракат этип чалыша, башгъалагъа да шолай насигьатлар бере.
Бай сынаву булангъы муаллим оьзюню иш ёлдашларына да янгы технологияланы къоллавну къайдаларын, компьютер булан пайдаланып оьтгереген дарслар гьазир этеген кюйлерин уьйрете, олагъа ишинде кёмек эте.
Хосар Шагьманаевич школада ишлеген йылларыны узагъында ахтарыв ишлер булан машгъул. Ол юрютеген ахтарыв ишлени натижасында Гьели юртну тарихини кёп тюрлю ачылмай къалгъан бетлери ачыкъ болгъан, кёп агьвалатлар арагъа чыкъгъан. Ахтарывланы бирдагъы-бир тармагъы Уллу Ватан давда белгисиз тас болгъан деп гьисап этилинип къалгъан адамлар булан байлавлу. Х.Хосаровну кёмеклиги булан Гьелиден, Къарабудагъгент райондан гетип, къайтмай къалгъанланы хыйлыларыны атлары, гёмюлген къабурлары аян болгъан. Бир якъдан, гележек учун пайдалы, бирдагъы якъдан, Аллагь учун этилинеген бу уллу зувап ишни юрютген юртлусуна гьелилилер уллу гьюрмет булан янаша.
Муаллимни ишине къыймат берегенде, ону алдында охуйгъан яшланы билим даражасы да, олар етген уьстюнлюклер де гьисапгъа алына. Шо ягъындан алгъанда Х.Хосаровну охувчулары да кёп керенлер район ва республика оьлчевдеги олимпиадаларда, гьар тюрлю конкурсларда алдынлы ерлени алгъан. Алдынлы ерлери саялы муаллим Къарабудагъгент районну билим берив управлениесини атындан грамоталар булан, Дагъыстанны билим берив ва илму министерлигини Гьюрметлев грамотасы булан савгъатлангъан.
Узакъ йылланы боюнда намуслу кюйде ишлейгени саялы ол «РФ-ни билим беривюню гьюрметли къуллукъчусу» деген атгъа да лайыкълы болгъан. Байрамыны алдында Хосар Шагьманаевич йимик эринмей-талмай ишлейген муаллимлеге гележекде яхшы савлукъ ва уьстюнлюклер ёрай туруп, нечакъы алгъышлар этсек де кёп тюгюл.
Р. МУСАЕВА.
СУРАТДА: Х. Хосаров охувчулар булан.
