Дагъыстанны Гьукуматыны борчларын заманлыкъгъа кютеген Абдулмуслим Абдулмуслимов Россияны Гьукуматыны Председателини заместители Александр Новак юрютеген жыйында ортакъчылыкъ этген. Шо генгешде аслу гьалда адамланы газ булан таъмин этив масъалалагъа къаралгъан. Россияны Президентини тапшурувун бу йылны ахырына кютме, шо ишлени чалтлашдырма гереклиги ачыкъ болду.
Жыйында эсгерилген кюйде, россиялылар оьзлени газ булан таъмин этмек учун 652 минг арза гелип битген, шолардан 225 мингине байлавлу дыгъарлар да этилинген. Шо дыгъарлагъа гёре 100 минг уьйге газ тартылгъан.
Дагъыстанда «газлашдырывну» штабына Сергей Меликов башчылыкъ эте. Адамлардан гелеген арзаланы газ къуллукъдагъылар, шолай да МФЦ-ни бёлюклеринде къабул этиле.
А.Абдулмуслимов билдирген кюйде, дагъыстанлылардан 1,5 минг арза къабул этилинген. Шолардан 313-сю булан дыгъар этилинген. 94 уьйге газ быргъы етишдирилген ва 64 агьлю газны къоллама башлагъан.
Озокъда, адамланы уьйлерин газлашдырывгъа бакъгъан якъда кёп соравлары бола. Дагъы да айтабыз, газ уьйге ерли тартыла, уьйню ичиндеги ишлер гьакъ берилип этиле. Шону учун да гьар ожакъны документлери толу кюйде гьазир болма герек, шо заманда агьлю булан дыгъар этиле.
Эгер де башгъа соравлар болса, шолагъа жаваплар алмакъ учун, биз газ булан таъмин этив компанияланы башчылары булан ёлугъув да оьтгережекбиз.
