Яйны баш гюнлери юрт хозяйство тармакъда жаваплы гюнлерден бири гьисаплана. Юзюм бавларда борлаланы байлав, тюпден гелеген япыракъланы тазалав, чёп отлагъа, зараллы жан-жаныварлагъа къаршы дарманлар себив ишлер актив кюйде юрюле.

Авлакъчыланы, гьайванчыланы ишлери де юзюмчюленикинден аз тюгюл десек, янгылыш болмас. Буланы жамият гьайванлагъа къышлавгъа тарыкълы къадарда къатты емлер гьазирлев масъала бирлешдире. О буса ясли-бавланы, оьзге охув ожакъланы, къурумланы тарыкълы даражада эт, сют продукталар булан таъмин этив булан байлавлу. Шону гьисапгъа алып, эки де якъ жаваплы кампанияны лап оьр даражада оьтгеривге тындырыкълы гьазирлик гёрген.

Къаягент район аслу гьалда юрт хозяйство булан байлангъан. Шону гьисапгъа алып, районда бар хозяйстволарда уьст-де токътагъан масъалаланы чечивге байлавлу мекенли чаралар гёрюле. «Къаягент» деген пачалыкъ унитар предприятие − шоланы бириси. Мундагъы юзюм бавланы майданы 500 гектардан айлана, 400 гектар ерде гюзлюклер де оьсе.

Хозяйствону юзюм­люк­­лериндеги ишлени эки юзюмчюлюк бригаданы ишчилери кюте. Бугюнлерде юзюмчюлени ишлери къыстав: бавларда байлав, сугъарыв ва оьзге ишлер юрюле.

Жамият гьайванлар учун къатты емлер гьазирлев компания да тамамланма тура. Хозяйствода гьайванланы къышлавун уьстюнлю оьтгермек учун таман болур чакъы сенаж гьазирленген ва къуюлагъа тёгюлген. Ондан къайры, 194 гектардагъы биченликлер чалынгъан. Къысылгъан бичен тайлар таман болур чакъы даражада болдурулгъан ва фермада аракъларда ерлешдирилген.

Предприятиени директору Магьамматшакир Алибековну, хозяйство-ну баш агроному И. Ши­ха­лиевни, авлакъчыланы бри­гадири Дагьир Алавов­ну сёзюне гёре бары да ишлер бу йыл бек тизив. Къышлав уьстюнлю оьтежегине шеклик ёкъ.

Хозяйствону юзюмчюлери де бу йыл бай тюшюм къайтармагъа умут этелер. Гьава шартлар да бу йыл юрт хозяйствода чалышагъанлагъа онгай­лы ге­ле. Айтагъаным, 2023-нчю йылны къышы, язбашы арив оьтдю. Йыл къарлы, янгурлу, язбаш буса салкъын болду. Оьз­леге Пирдавус Табтухова, Магьамматнаби Шихалиев башчылыкъ этеген юзюмчюлюк бригадаланы бавларында ишлени сан яны оьр даражада юрюле.

Предприятиени директору Магьамматшакир Алибековну айтывуна гё­ре, хозяйствону авлакъларында гюзлюклерден де мол тюшюм къаравуллана. Бугюн жаваплы кампанияны къурумлу оьтгеривге гьазирлик гёрюле. Хас буйрукъ булан баш агрономну, авлакъчылыкъ ва механизатор бригадаланы алдына уллу масъалалар салынгъан. Ял алмагъа чола ёкъ.