Март айны 28-нде Магьачкъаладагъы Дослукъну уьюнде «Дагестанская правда» газетни биринчи номери чыкъгъанлы 105 йыл битегенликге байлавлу шатлы жыйын оьтгерилди. Шонда Дагъыстанны Гьукуматыны Председатели Абдулмуслим Абдулмуслимов, Халкъ Жыйынны депутатлары, гьакимиятны вакиллери, илму чалышывчулар ва интеллигенцияны оьзге вакиллери ортакъчылыкъ этди.

Жыйынны ортакъчылары газетни коллективи онгаргъан выставка булан да таныш болду. Шонда «Дагестанский труженик» деген аты булан чыкъгъан газетни башлапгъы, 1918-нчи йылдан башлап «Дагестанская правда» деген ат булан чыгъарылгъан номерлери ерлешдирилген эди. Сиясатгъа, жамият яшавгъа, маданиятгъа, илмуну оьсювюне, янгы технологиялагъа, спортгъа ва оьзге тюрлю тармакълагъа багъышланып чыкъгъан номерлери де жыйылгъанланы тергевюн тартды, олар выставкагъа салынгъан материаллагъа тамашалыкъ этип къарап чыкъдылар.

Шатлы жыйынны ача туруп, А.Абдулмуслимов гьар гюнлюк агьамиятлы масъалаланы гётерегени, йылланы боюнда охувчуланы янындан къазангъан абуру учун газетни коллективине баракалла билдирди.

«Шо йылланы ичинде «Дагестанская правда» республиканы ва уьлкебизни халкълары булан бирче жамият-политика якъдан оьсювню, дагъыс­танлылагъа агьамиятлы маълумат беривню девюрюн уьстюнлю кюйде оьтген. Огъар янгыз газет деп айтып къойма болмайбыз, бизин республиканы тарихи деп айтабыз.

Инкъылапдан сонггъу йыллар газет маданиятгъа, билим беривге, маданият ожакъланы къурувгъа, билимсизликни тайдырывгъа, иш ерлени болдурувгъа аслу тергев берип юрюген. Уллу Ватан давну биринчи гюнлеринден башлап, бизин якълылар дав майданларда гёрсетеген къоччакълыкъланы, загьматчыланы уьстюнлюк учун этген гьаракатларын язып тургъан. Шо агьвалатланы эсге ала туруп, уьлкебизни халкълары «Бары ишибиз Уьстюнлюк учун!» деген чакъырывну тюбюнде бирикген»,–деди Гьукуматны Председатели.
Ол дагъы да «Дагестанская правда» газетни коллективине, оьзлени гьар гюнлюк гьаракаты булан дагъыстан публицистиканы варислигин сакълама ва оьсдюрме чалышагъанны да ташдыргъан.

ДР-ни маданият минист­ри Зарема Бутаева газетни коллективин къутлады. «Дагъыстанны аслу жамият-политика газетини дослукъда ишлейген яратывчулукъ, пагьмулу коллективин юбилейи булан къутлайман! Газет республиканы маълумат ва сиясат яшавунда даим де алда юрюген. Бизин учун буса кёп миллетлени къуршай­гъан республикабызны маданиятына, театрларыбызгъа, музейлерибизге китапханаларыбызгъа оьзюню бетлеринде аслу ер берегени учун газетибизни гьаракаты айрокъда агьамиятлы»,–деди министр.
Сёйлевюнден сонг маданият министри газетни 105 йыллыкъ юбилейине байлавлу минис­терликни Гьюрметлев грамотасын баш редактор Бурлият Токъболатовагъа тапшурду.