Европа лиганы экинчи оюнунда «Анжи» очколар къазанып болмады. Бу гезик «Тоттенхэм» – Хотспур (Лондон, Англия) Раменское шагьарда, бизин Россияны футбол майданында Анжини енгди. «Анжи» оюнну Помазан, Ангбва, Эвертон, Аделейе, Тагьирбеков, Жусилей, Агьматов, Соломатин, Разак, Сердеров ва Абдулавов булан башлады. Англияны чемпионаты – Европада чинк де айтылгъан чемпионатланы бири.
«Анжиге» баш тренери Гьажи Гьажиев салгъан биринчи масъала бизин къапуну бек гьаракат булан якъламакъ эди. Бизинкилер оюнну яман да башламады, оюнну ярым сагьаты гетгинче бизден Тоттенхэм кёп гючлю деп бирев де айтмас эди. Топ гийирердей юз процентли мюгьлети бир команданы да болмады.
Отуз дёртюнчю минутда буса, бизин Тагьирбековну хатасындан пайдаланып, Тоттенхэмни футболисти Дефо оюнну санавун ачды. Арадан беш минут гетип, хапарсыз гирген биринчи топдан эсер — месер болуп турагъаны тайып да битмеген «Анжини» къапусуна Шадли экинчи топну гийирди. Командалар шо санав булан танапусгъа да гетди.
Экинчи таймны «Анжи» бираз башгъача ойнады. Сердеровну ва Исламнур Абдуллавовну орнуна артгъа салгъан оюнчулар Ласина Траоре ва А. Ещенко, сонг бир нече керен хаталар этген Б. Ангбваны орнуна А.Гьажибеков чыкъдылар. Янгы чыкъгъан оюнчуланы кёмеги булан «Анжи» «Тоттенхэмни» къапусуну алдында къоркъунчлу мюгьлетлер этме болду, тюзю, юз процентли мюгьлет деп оланы бирисине тюгюл айтма ярамай. «Анжи» оьзюню майданында 0:2 санав булан утдурду.
«Анжини» группадан чыкъма гьали де хыялы бар. «Тоттенхэм» – бу группада чинк де гючлю команда. Къалгъан «Шериф» ва «Тромсе» бизден бир де гючлю тюгюл. «Анжи» оланы енгме тарыкъ. Минглер булан Дагъыстан къаравчулар шогъар умут эте.
Осал ойнады
«Анжини» бу йыл алтынчы октябрде Татарстанны тахшагьарында Россияны чемпионатында «Рубин» «Анжи» булан ёлукъду. «Анжи» къазанлылагъа 5:1 санав булан утдурду.
Арт вакъти «Рубинни» ишлери онча айтардай Россияны чемпионатында яхшы юрюмей, шогъар гёре къаравчулар да «Анжи» Къазанда бир очко сама алар, деп умут эте эди.
Оюнну он биринчи минутунда бизин къапучу, М. Кержаковну хатасындан пайдаланып, «Рубинни» футболисти М. Вакасо бизге биринчи топну гийирди. Отузунчу минутда А. Рязанцев бизин штрафнойгъа гирип, оюнну санавун 2-0 этди. Биринчи тайм шо санав булан битме де битди.
Бу оюнну сав команда къапучудан башлап, чапгъынчылагъа ерли бек осал ойнады.
Гьажи Гьажиев оюн битгенде береген баянлыгъында, эки гюн алдын «Тоттенхэм» булан ойнайгъанда, команда бары гючюн шо оюнда къойду деп кант этди.
Гьасиликалам, «Анжи» шо оюнну 1:5 санав булан утдурду.
Оюн битгенде «Анжини» лап да жагьил чапгъынчысы, биргине-бир бизинкилер гийирген топну автору – Исламнур Абдулавов команданы осал ойнагъанын оьзлерден гечсин деп къаравчулагъа тилевюн билдирди.
Суратда: «Рубинни» футболисти, тюрклю Г. Къараденгиз «Анжини» къапусуна гирген голгъа сююне.
