Бираз алда  республика билим берив центрда 2023-нчю йылны ичинде муаллимлени арасында оьтгерилип тургъан конкурсланы гьасиллерине гёре белгиленген инг яхшы ишлейген, бажарывлу муаллимлеге премия сертификатлар тапшурмакъ муратда шатлы жыйын  оьтгерилген.

 

Алдынлыкъны къазангъан муаллимлеге сертификатланы «Новая школа» деген проектни ерли координатору, ДР-ни Халкъ Жыйыныны билим беривге ва илмугъа къарайгъан комитетини председатели Елена Павлюченко тапшургъан.

Умуми алгъанда, федерал даражада эсгерилген савгъатгъа лайыкълы 40 муаллим белгиленген. Оланы гьариси РФ-ни Президенти Владимир Путинни къарары булан 200 минг манатны къадарындагъы премиягъа ес болгъан, бирдагъы 100 муаллим – республика конкурсланы алдынлылары, 100 минг манатны къадарындагъы акъча савгъатны къазангъан. Шо гюн муаллимлер учун бирдагъы бир сююнч болгъан. Демек, иш уьс­тюнде гьаракатчылыгъы, ва етишген уьс­тюнлюклери учун, олагъа «ДР-ни билим беривюню отличниги» деген гьюрметли ат берилген. Шо сертификатлар булан бирче тёшге тагъа­гъан белги­лер де тапшурулгъан.

Уллу савгъатлагъа ес болгъанланы арасында Къакъашура 2 номерли школаны муаллими Юлдуз Магьамматова да бар.

Юлдуз Магьамматова 1975-нчи йылны август айыны 1-нде къарабу-дагъгентли Гьажимуратны ва Маржанатны агьлюсюнде тувгъан. Ол ата юртундагъы 1 номерли орта школаны тамамлап чыкъгъан сонг, оьзюню атасы, белгили художник, композитор ва шаир Гьажимурат Абдуллаевни насигьатына гёре Избербаш шагьардагъы педагогика училищени музыка дарсланы муаллимлерин гьазирлейген бёлюгюне охума тюше.

1994-нчю йылда Ю. Магьамматова охувун тамамлай ва Къарабудагъгент гимназияда оьзюню загьмат ёлун башлай. Узакъ къалмай, 1998-нчи йылда къысмат ону хоншу юртгъа чыгъара. Энни гьаракатчы муаллим Юлдуз Гьажимуратовна оьзю­ню кёп сююп сайлагъан, йыр булан байлавлу касбусун Къакъашура 2 номерли орта школада узата. Ким булан да къыйышып бажарагъан йымышакъ сёзлю, илиякълы къыз аз заманны ичинде ят юртда, демек,  янгы коллективинде де оьз болуп, гьатта охувчуларыны сюювюн къазана. Юлдуз оьзюню ишине уллу жавапчылыкъ булан янаша. Ол музыка алатланы  къайсында да ойнап бажара ва шону булан яшланы дарсгъа иштагьын гётере.

Сонг да, пагьмулу яшланы арагъа чыгъарып, олар булан айрыча ишлеп, гьар тюрлю конкурсларда, олимпиадаларда ортакъчылыкъ этип, алдынлы ерлеге ес болгъан ва кёп санавда грамоталар булан савгъатлангъан.

Юлдуз Магьамматованы загьмат стажы – 25 йыл. Ол оьр категориялы муаллим.

Къакъашура 2 номерли школаны коллективи иш ёлдашы Юлдуз Магьамматованы лайыкълы савгъаты булан къутлай туруп, къатты савлукъ, аманлыкъ ва ишинде уьстюнлюклер ёрай.

 

Нюрбият АБДУЛЛАБЕКОВА.