Медицина къуллукъчулар гьар заманда халкъ арада абур да, сый да къазанып гелген. Неге тюгюл, медицина тармакъда ишлейгенлер адамланы савлугъун багъып беклешдирмек муратда къасткъылып чалышалар. Оланы атына гьар гюн баракалла айтып, алгъыш тилеп турсакъ да кёп болмажакъ деп эсибизге геле.
Акъ халатлы «малайиклени» ишинден адамны савлугъу да, гележек яшаву да гьасил деп айтсакъ кёп къопдурув болмас.
Бабаюрт районда савлукъ сакълав тармакъда кёп бажарывлу, оьзлени атына исси ва макътав сёзлер тийишли касбучулар ишлей. Оланы ал сыдраларында Люксембург юртдагъы ФАП-да ишлейген Марзият Алимсолтановна Гьюсебова да бар.
Марзият Гьюсебованы загьмат стажы 36 йылгъа етише. Шо йыллардан берли ол юреги авуп танглагъан касбусуна гьалал ва амин кюйде къуллукъ эте. Ол 1968-нчи йылда Люксембургда тувгъан. Юртдагъы школаны охуп битдирген сонг, 1985-нчи йылда охувун узатмагъа Владимир шагьардагъы медицина училищеге документлерин бере ва уьстюнлю кюйде экзаменлер де берип, охума тюше.
Училещеде охуйгъан йыллар бир мюгьлетде йимик тез гетип къала.
Айтагъаным, 1987-нчи йылда Марзият къолуна диплом да алып, Дагъыстангъа къайта. Шо йыл ноябр айда Бабаюртдагъы поликлиникада яшланы багъагъан медсестра гьисапда загьмат ёлун башлай. Бир йылдан сонг, ата юрту Люксембургдагъы ФАП-гъа ишге чыгъып, кёп сюеген касбусун узата. Башлап яшланы багъагъан медсестраны борчларын кюте. Сонггъа таба, акушер болуп ишин узата.
Юрт ерде ишлейген медицина къуллукъчу янгыз оьзюню тувра борчларын кютюп къоймай, тарыкъ буса гече демей, гюн демей, иссиге де, сувукъгъа да къарамай аврувну уьстюне алгъасай. Марзият да шолай ишине берилген сынавлу касбучу. Ол ишин тындырыкълы ва мекенли кютмесе рагьат болмай. Оьзюне тапшурулгъан борчлагъа жаваплы янаша. Медицина къуллукъ-чулардан адамны савлугъу гьасил болагъанны яхшы англай.
Яшгъа авур къатынланы гьисабын юрюте, оланы савлугъун багъа, гьар ай болажакъ аналаны Бабаюртгъа акушер-гинекологну тергевюне бакъдыра. Яшгъа токътагъан къатынланы уьйлерине барып, олагъа пайдалы насигьатлар бере. Болажакъ ананы ва яшны савлугъу акушерни гьар гюнлюк тергевюню тюбюнде ва гьайында бола.
– Бизин юртдагъы ФАП-ны ёлбашчысы Байрамали Садуллаевич Турлавов бугюнлерде Украина бойдагъы хас асгер гьаракатда ортакъчылыкъ эте ва оьзюню ватандашлыкъ борчун къоччакъ кюйде юрюте. Огъар ва ону асгер ёлдашларына уьстюнлюк къазанып, уьйлеригизге сав-саламат къайтыгъыз деп айтмагъа сюемен,- деп хабарлай Марзият Гьюсебова. — Биз гьали ФАП-да эки адам ишлейбиз: мен ва гиччи яшланы багъагъан медсестра Гюлзагьра Мурзабекова. Шо саялы да белгили йырда йырлайгъан кюйде «оьзюбюз саялы да ва шо улан саялы да» дегенлей къаст этебиз.
Гертиден де, огъар заведующийни борчларын кютмеге тюше. Амма Марзият ва ону иш ёлдашы Гюлзагьра ругьундан тюшмей, къаст этип чалыша деп айтсакъ ялгъан болмас.
Марзият бойнуна алгъан ишни даим де мекенли ва тындырыкълы этип уьйренген касбучу. Шо саялы ону ишинде де, юрт арада да абуру, сыйы бар. О янгыз болажакъ аналаны багъып къоймай, кёмек излеп гелгенлени бир де къаравсуз къоймай. Гече демей, гюн демей аврувгъа етишме алгъасай. Заманында тийишли чаралар оьтгерилсе, къайсы аврувну да енгиллешдирип болагъанны ол яхшы англай. Шо саялы да халкъ арада генг кюйде гьар тюрлю аврувланы алдын алывгъа байлавлу да ишлер юрютме къасткъыла.
Ишинде тюзелген йимик Марзият агьлю яшавунда да тюзелген деп айтмагъа болабыз. Ол 35 йыл алда кёп сююп къошулгъан яшав ёлдашы Адилхан Гьюсегенович Гьюсебов булан ким де сукъланардай агьлю къургъан. Адилхан Гьюсегенович узакъ йылланы боюнда ич ишлени район бёлюгюнде ишлеп, бугюнлерде пенсиягъа чыгъып, уьйде ял ала.
Булай татывлу агьлюде эки улан тарбиялангъан. Илмидин ва Алавудин оьр охув ожакъларда билим алып, экиси де юрист касбугъа ес болун, бугюнлерде Магьачкъала шагьарда ишлейлер.
Марзият Гьюсебованы бугюнлерде ишлери къыставлу. Аврувлар ону уьстюне геле, уьюне чакъырагъан гезиклер де аз болмай. Ол гьар аврувну юрегинден сезе. Гьар аврувгъа тийишли сёзлер табып, ону гёнгюн ала, ругьун гётере. Савлукъ сакълав тармакъда чалышагъан касбучулар шолай болмагъа да герек.
Биз оьз къыйыны булан яшавда касбу ва агьлю насибин тапгъан Марзият Гьюсебовагъа ишинде оьрлюклер ёрай туруп, яшавда шатлы ва сююнчлю гюнлеригиз кёп болсун деп айтмагъа сюебиз.
Бэлла ГЬАЖИГЕЛДИЕВА.
