Интернетде хасавюрт таксистлени бириси яза: «Бугюн мен Хасавюртдан Магьачкъаладагъы 4 номерли яшлар табагъан уьюне яшгъа авур къатынгишини алып бармагъа герек эдим. Магьач-къалагъа тез етишдик, ёлда бир пуршавлукъ да болмады, тек шагьарны ичине гиргенде машинлени кёплюгюнден, тыгъыслыгъындан ёл бойда оьгюз арба йимик гьаран-гьаран алгъа багъып тербене эдик. Насипге шо мюгьлетде ёл ягъада токътагъан полицейскийлени эс этип, олагъа тувулунгъан гьалны англатдым. Олар артыкъ соравлар да бере турмайлы, таксимдеги къатынгишини гьалын гёрюп, алгъасап оьзлени машинин якъдылар ва артыбызгъа тюш деп буюрдулар.
Гьасиликалам, шюкюр Аллагьгъа , узакъ да къалмай азархананы абзарына гелип токътадыкъ. Сонг магъа къатынгишини ювукъ адамлары билдирген кюйде, ол арадан ярым сагьат оьтюп къыз тапгъан.
Биз ери болуп да, ерсиз де полицейскийлени ишин кёп танкъыт эте болабыз. Амма бугюн мен оланы атына алгъышлар этемен. Аллагь сизге аманлыкъ, сююнчлер берсин!
Мени олагъа шо къыставуллукъда шону оьзлеге айтмагъа чолам болмады, биргине-бир машинини номерлери эсимде къалды – 2107».
Таксист билдиривюню тюбюне атын язмагъан, тек шо агьвалат гертиден де болгъанына менде бир шеклик де тувулунмай.
Озокъда, шолай рагьмулукъну мисаллары яшавубузда дагъы да кёп болгъанны сюер эдик. Амма гьакъыкъатда башгъа мисаллагъа да расланабыз.
Алав АЛИЕВ.
