Алдагъы гюнлерде Эрпелидеги орта школада футбол оюндан ярышлар оьтгерилген. Украина бойда юрюлеген асгер гьаракатда жанлары къыйылгъан юртлуланы эсделигине багъышлангъан шо ярышларда 5-7 класларында билим алагъан уланлар ортакъчылыкъ этген.
Эрпелидеги орта школаны директоруну тарбиялав ишлеге къарайгъан заместители Гьайбулла Гьайбуллаев бизге билдиргени йимик, шо ярышланы гьасиллерине гёре, 5 «в» ва 7 «а» класларыны командалары алдынлы ерлеге ес болгъан. Ярышланы алдынлыларына кубоклар ва грамоталар тапшурулгъан.
Шо гьакъда айта туруп, Украина бойда юрюлеген асгер гьаракатгъа жанлары къыйылгъан, оьлген сонг Къоччакълыкъны ордени булан савгъатлангъан эрпелилилени бешевю де эсделигин даимлешдирмек учун юрт школада муратгъа къыйышывлу иш юрюле. Оланы ювукъ адамлары ва Буйнакск районну билим берив управлениесини жаваплы къуллукъчулары футбол оюндан ярышланы ачылывунда да ортакъчылыгъын болдургъан.
