Тутушуп ябушувдан яшёрюмлени арасында оьтгерилген Францияны чемпионатында хасавюртлу къумукъ улан Алибек Къайырбеков биринчи ерни къазангъан деген шат хабар Хасавюртгъа тез етишди.
Алибекге 16 йыл бола. Тутушуп ябушув булан башлап ол Хасавюртда машгъул болгъан. Шагьардагъы 3 номерли орта школада охугъан. Бугюн Францияда яшай. Клермон-Феран шагьардагъы коллежде охуй. Францияны чемпионатларында Алибек эки йыл алда уьчюнчю ва гетген йыл экинчи ерлеге ес болгъан.
Бу йыл Ницца деген шагьарда оьтгерилген Францияны чемпионатында ол, 54 кило авурлукъда финал ёлугъувда яхшы техника ва къастлыкъ гёрсетип, уьст гелген.
Яш кочап артдагъы уьч йылны ичинде Германияда ва Италияда оьтгерилген халкъара турнирлерде де биринчи савгъатланы къазангъан. Голландиядагъы турнирде буса экинчи ерни алгъан.
Бугюн Алибек оьзюню авурлугъунда Францияны инг де гючлю кочапларындан санала.
– Францияны чемпионатларында уьч керен ортакъчылыкъ этгенмен. Эки керен савгъатлар алдым. Мени авурлугъумда биринчи ерни алма сюегенлер аз тюгюл эди. Тек бу гезик магъа оьр канзиге гётерилме насип болду, –дей Алибек.
Хасавюртлу яш чемпионну Франциядагъы уллу уьстюнлюгю булан къутлайбыз.
Измулла ГЬАЖИЕВ.
