Буйнакск район
Тёбен Къазаныш юртунда яшайгъан Расул ва Хадижат Сайкумовланы уланы Магьач Украина бойда юрюлеген хас асгер гьаракатда десант бёлюклерде ортакъчылыкъ эте туруп, къоччакъ кюйде жан берген сонг «Къоччакълыкъ» деген орден булан савгъатлангъан.
Уллу тас этивге тарыгъан ата-ана уланы Магьач йимик Ватанын якълай туруп азиз жанларын къурбан этген асгер къуллукъчулагъа гьюрмет этип, «Эсделикни бавун» салма токъташалар. Олар юрегине тюшген мурадын яшавгъа чыгъара туруп, ата юртундагъы оьзлени 90 сотух ердеги участкасында 300-ге ювукъ емиш тереклер орнатып, шолагъа авлетлерине йимик къуллукъ да этелер. Бавдагъы тереклер оьсюп емиш берме башлагъанда олар шо берекетни Оьр Къазаныш юртдагъы уллу чагъындагъы ва сакъат адамланы пансионатында турагъанлагъа ва уьзюрю адамлагъа гьавайын оьлешме юрегине тутгъанлар.
Савлай республикада ва ондан тышда да дав гьаракатларда ортакъчылыкъ эте туруп жанларын къурбан этген игит уланланы эсделигини гьюрметине емиш ва оьзге тюрлю тереклер орнатма башлагъанлыкъ мердешге айланып битген.
Гертиден де, терек орнатыв, бав салыв гьар къайсы девюрлерде де макътала гелген адат. Шо асил адатны унутулма, тас болма къоймай, къагьрулу къысмат буюруп къопгъан къайгъысын аз енгил этмек учун да янгыдан яшавгъа гийирме эс тапгъан шо агьлюню вакиллерине де, оланы сиптесин якълап инсаплы иш юрютеген оьзгелеге де минг макътавлар тийишли.
Бугюнлерде кёп санавдагъы шагьарларда, юртларда ва охув ожакъларда орнатылып турагъан бавлар гележекде гьартюрлю хас гьаракатларда, урушларда азиз авлетлерин тас этген агьлюлер, ата-аналар ичиндеги сырларын чечеген, оланы бирикдиреген отавлар болажагъына мен гьакъ юрегимден инанаман.
Казим КЪАГЬРУМАН.
