Дагъыстанны  ахтарыв  управлениесини ва «Динамо Магьачкъала» деген футбол клубну ёлбашчылары ноябр айны 11-нде  Къаягент районну Герга  юртундагъы кёлге тюшюп, сувда батылып барагъан агъа-ини Абдулла ва Халит Къадиевлени къутгъаргъан Абдуллабек Загьирбеков ва Гьапис Исакъов булан ёлукъгъан.

Оьтгерилген  шо  ёлугъувну барышында яшлар дарслардан сонг оьзлер не  булан  машгъул  болагъанын,  олай да  спортда етишген оьрлюклери гьакъда хабарлап айтгъан. Шо ёлугъувну ортакъчылары биринден-бири алып дегенлей олагъа оьзлени разилигин билдирген. Сувда батылып барагъанланы къутгъаргъаны учун  дипломлар да тапшургъан.

 

«Динамо Магьачкъала» деген клубну президенти Гьажи Гьажиев олагъа эсгерилген командагъа къуршалгъан спортчуланы къолбаслары булангъы футбол топланы, олай да эсделикге оьзге савгъатланы да берген. Къаягент районну билим берив управлениесини Telegram-каналында шо гьакъда билдириле.

 

Насрулла БАЙБОЛАТОВ.