Емлер гьазирлене

(Репортаж)


«Къаягент» пачалыкъ унитар предприятиеде гьайванчылыкъ тармакъны оьсдюрювге тийишли тергев бериле. Хозяйствода 160 гьайван, 2500-ден артыкъ маллар сакълана. Гьайванланы къышдан чыгъарывну масъаласын мунда бир де унутмай. Гьайванчылар яшайгъан, ял алагъан уьйлер, гьайванлар сакъланагъан аранлагъа гьар йыл ремонт этиле. ГУП-ну ёлбашчысы, касбучулар ишге жаваплы янашалар.

Майны орталарындан тутуп, хозяйствода гьайванлар учун къышгъа емлер гьазирлев кампания башланды.
– Къышлыкъгъа емлер гьазирлев – бек жавап­лы иш. Шону гьисапгъа алып, бир ай алда хас буйрукъ булан емлер гьазирлевге байлавлу чараланы белгиледик, – дей предприятиени директору Магьамматшакир Алибеков. –Касбучулар, ишчилер, механизаторлар борчларын яхшы билелер ва гьаракат этип загьмат тёгелер. Оланы ишине разибиз.
Предприятиени биченликлери 194 гектаргъа етише. Биз «Таллыкъ» деген участкагъа етишгенде, сагьат 11 эди. «Немка» деген комбайн силос къуюлагъа тёгюлеген яшыл отланы оруп, Абдулбасир Магьамматовну «КамАЗ» машинин толтура тура эдилер.

– 2023-нчю йыл берекетли йылгъа ошай, – дей емлер топлайгъан бригаданы башчысы Дагьир Алавов. – Явгъан явунлардан сонг отлар яхшы оьсген, аслам бичен чалына. Исси гюнлерден пайдаланып, биченлени тас этивсюз чалмагъа ва ягъабыздагъы фермагъа етишдирип тез ерлешдирмеге тарыкъ.
Талада бичен чала­гъан комбайн ва прес-подборщик ишлей.

– Ял алмагъа да чола ёкъ, – дей бригадир булангъы лакъырыбызгъа къошулгъан сынавлу механизатор Камал Камалов. – Чалынагъан оьсюмлюклер нечакъы да яхшы. Гьавалар тез алышына. Бир гюн бириси гюнге ошамай. Шону учун биченни тез чалып, жыйып, тийишли ерлеге ерлешдирме къасткъылабыз.
Бригадирни, ишчилени, механизаторланы гьаракаты хозяйствону ёлбашчысы, баш касбучулары белгилеген производство масъалаланы чечивге бакъдырылгъан. Гьайванлар учун сенаж гьазирлев, бичен чалыв бирче оьтгериле
.
– Къышлавну оьтгеривде яшыл оьсюмлюклерден гьазирленген сан яны булангъы силос да тарыкъ бола. Бу йыл биз эки де къуюну толтурмагъа къастыбыз бар. Оланы гьарисине 350-400 тон гире. Гёресиз, шоланы бириси толгъан. Силос экинчи къуюгъа тёшележек, – дей гьайванчыланы бригадири Камал Камалов. – Фермагъа гьар гюн бичен тайлар да гелтириле. Оланы барысы да алданокъ гьазирленген хас ерлерде ерлешдириле. Бичен, салам тайлардан къурулгъан аракълар алдагъы йыллар ачыкъ гьаваны тюбюнде къала эди. Тас этивлени алдын алмакъ муратда 500 квад­рат метр ерде гётерме къурдукъ. Гьали янгурлардан, къардан къоркъмайбыз, – дей бригадир.

Къазмалардагъы ферманы тюбюндеги биченликлер 65 гектарны тутгъан. Онда да емлер гьазирлейген заманлыкъ бригада, бир комбайн, прес-подборщик къуршалгъан. Ишлер де къурумлу бара. Хозяйствода юрюлеген гьар гюнлюк ишлени гёрмесе рагьатлыкъ тапмайгъан ёлбашчы М. Алибеков машинни тёбендеги бичен талагъа бурду. Биз де огъар ишинде оьрлюклер ёрап, савболлашып, къайтмагъа ёл чыкъдыкъ.