Бабаюртлу къоччакъ улан Расул Зубакъов Россияны оборона министри Сергей Шойгуну буйругъуна гёре «Парахатлыкъ болдурув гючлени гьаракатыны ортакъчысы» деген медальгъа ес болгъан. 

Расул Зубакъов – сынавлу асгер къуллукъчу. Ол парахатлыкъ болдурувчулар булан бирге Абхазияда къуллугъун кютген ва онда Абхазия республиканы гьукумат савгъаты булан да савгъатлангъан.

Биз алда эсгерип гетген кюйде, Расул Зубакъов Украина бойда юрюлюп турагъан хас дав гьаракатда оьзюн яхшы гёрсетген. Оьзюне тапшурулгъан дав масъаланы чечегенде гёрсетген къоччакълыгъы ва игитлиги саялы огъар Жуковну медалы берилген.

Бизге гьали-гьалилерде белгили болгъангъа гёре, къумукъ халкъны оьктемлиги, къоччакъ уланы Расул Зубакъовгъа, оьзюню дав борчларын бажарывлу кюйде кютегени, Россияны Тав Къарабагъда парахатлыкъ болдурмакъ учун бакъдырылгъан асгер бёлюкде къуллукъ эте туруп, хас тапшурувланы чечивде гёрсетген гьаракаты ва къастлыгъы саялы, асгер бёлюгюню башы генерал-полковник А. Ленцовну буйругъуна гёре Гьюрметлев грамота тапшурулгъан.

Биз Расул Зубакъов йимик элине гьалал къуллукъ этеген уланлар булан оьктем болабыз ва оланы тарбиялагъан ата-аналагъа баракалла билдиребиз.