Бразилияда дюньяны чемпионатында Россияны жыйым командасы биринчи оюнунда Къыбла Кореяны командасы булан 1–1 санавгъа ойнагъан сонг, экинчи оюнну Бельгияны жыйым командасы булан ойнама тюше эди. Бу оюнну утмаса, россиялылар турнир таблицада оьзлени бек четим гьалгъа салагъаны мекенли эди. Болса болсун, савлай оюнну бизин жыйым команда кёп аста, къоркъа туруп ойнады, оюн битме бир минут къалгъанда буса, оьзюню къапусуна гол да йиберип, топурагъы Дагъыстандан да гиччи Бельгиягъа утдуруп токътады.
Дюньяны чемпионатына гелген шонча командаланы арасында, бизин жыйым команданы асталыгъы, къоркъуп ойнайгъаны, гьатта осаллыгъы айрыча гёрюне. Жап-жагьил чапгъынчыбыз Кокорин, бельгияланы отуз алты йыл болагъан якълавчусундан алгъа чыгъып болмады.
РФ-ны спортгъа къарайгъан министри Мутко айтагъангъа гёре, Россияны футболунда ювукъ арада кёп алмашынывлар къаравуллана.
Июн айны 27-синде Россияны командасы Алжирни жыйым командасы булан группада ахырынчы оюнну ойнай. Шо оюнну утса, бизин команда 1/8 финалгъа чыгъа. Утдурса яда тенг санавгъа ойнаса, чемпионатдан къайта.
«Анжи» команданы биринчи жыйымы Кисловодск шагьарда юрюлдю. Шо жыйымда команданы янгы баш тренери Ташуев, «Анжиде» ойнама сюеген янгы футболистлеге оьзлени гьюнерин гёрсетмеге имканлыкълар да берип, оьзю олагъа къарап, оланы къыйматлады. Милли лигадан «Анжиде» ойнама сюеген футболистлер кёп. Оланы бизин тренер чемпионат башланма ювукъ бола туруп сайлагъан сонг «Анжини» составын толтурма ким болагъаны билинежек. Гьалиге мекенли шулай янгылыкълар бар. Магьаммат Митришев грозныйлы «Терекден», бир йыллыкъ контрактгъа къол да салып, гелеген йыл бизде ойнама токъташды.
Гелеген йылдан тутуп, «Анжини» футболистлери Одил Агьматов ва Никита Бурмистров Краснодарны «Краснодар» командасында ойнажакъ. Команда булан савболлашагъанда Одил бизин Дагъыстангъа да, къаравчулагъа да кёп исси сёзлер айтды, бизге бек разилигин билдирди: «Россияда чинк де гючлю къаравчу – фанатлар дагъыстанлы фанатлар!» – деди.
Янгы иш башлап турагъан команданы генеральный директору Магьаммат Исаевни орнуна акционер янгы адамны салгъан. Ол да – Сергей Владимирович Кораблёв. Исаев буса Кораблёвну заместители болуп токътады.
«Анжи» Стоврополну «Динамо – ГТС» командасы булан биринчи тергев оюнун да ойнады. Оюнну санаву: 8–0. «Анжини» составында кёбюсю дагъыстанлы футболистлер ойнады.
Москвалы ЦСКА-ны йигирма бир йыллыкъ Пётр Тен деген футболисти, гелеген йылдан тутуп, бизин командада ойнажакъ.
«Анжини» экинчи жыйымы буссагьат Австрияда юрюлюп тура.
Шу янгылыкълар буссагьатгъа мекенли болуп битген. Команданы алдына Премьер лигагъа къайтмакъ деген масъала салынгъан. Футболистлени де, тренерлени де шо салынгъан масаланы чечмек – биринчи борчу.
Шарабутдин КИШИЕВ.
