Октябр айны 27-синде Магьачкъалада Дагъыстан парламентни 15-нчи сессиясы оьтгерилди. Ону барышында бугюнлерде инг агьамиятлыгъы булангъы масъалалагъа къаралды. Шолардан аслусу – Дагъыстанны Конституциясына алышынывлар этилив.

Бир башлап фракцияларыны вакиллери сессияда тавушгъа салынып къабул этилме герек шо масъалалагъа гёре оьзлени пикруларын англатгъан.

Законну проектин жыйылгъанлагъа Дагъыстанны Халкъ Жыйыныны шо масъалалагъа къарайгъан комитетини председатели Артур Исрапилов малим этди. Ону сёзлерине гёре, проектни Дагъыстанны Башчысы таклиф этген ва бу йыл 30-нчу июнда оьтгерилген сессияда биринчи охувда къабул этилинген. Сонг шо проект маълумат къуралларда чыкъгъан, «дёгерек столлар» оьтгерилген ва огъар экспертлени багьасы берилген.

Алышынывлагъа гёре Дагъыс­танны Аслу Законуна халкъланы ва этнический жамиятланы маданият оьзтёречелигине, ватандашланы яшавлукъ шартларын яхшылашдырывгъа ва экономика оьсювню болдурувгъа байлавлу пачалыкъ политиканы гьакъындагъы янгы статьялар къошула. Ондан къайры да, Дагъыстан Республиканы Башчысыны, Гьукуматыны ва Халкъ Жыйыныны хас ихтиярлары белгилене.

Бу документни гьазирлемек учун кёп иш этилген, гьар тюрлю комитетлерде, парламентни партия бёлюклеринде, Халкъ Жы­йыныны Президиумунда арагъа салынып ойлашылынгъан. Шо ёрукъда арагъа чыкъгъан 20-гъа ювукъ алышынывланы кёбюсю закон проектлеге гирген.
Бу закон проектни де депутатлар экинчи охувдан сонг къабул этди. Сессияда Дагъыс­тан парламентни председатели Завур Аскендеров, партияланы ёлбашчылары ва депутатлар чыгъып сёйлеген.
Тавушгъа салынгъан проектни якълап 74 депутат тавуш берген, экев къаршылыкъ билдирген ва экев тавуш бермеген.

«Дагъыстан Республиканы пачалыкъ савгъатларыны гьа­къында» деген законуна гёре алышынывлар этиле туруп респуб­ликаны пачалыкъ савгъатлары: «Гёрсетген къоччакълыгъы учун» деген ва Расул Гьамзатовну атындагъы медаллар, «Дагъыс­тан Республиканы ат къазангъан далапчысы», «Дагъыс­тан Республиканы от тюшювден сакъланывуну ат къазангъан къуллукъчусу» деген гьюрметли атлар токъташдырылгъан.

Федерал законлардагъы алышынывлагъа гёре республика да алышынывлар этген.
Депутатланы тавуш беривю булан сессияны барышында ­республиканы 5 суд участкаларына мировой судьялар да сайлангъан.

Сессияда оьзге масъалалагъа да къаралгъан.