Дагъыстандан Украинагъа барып бир нече врачлар, медсестралар ишлеп турагъаны 1 йыл бите тура демеге ярай. Мисал учун, республикабыздан гетген 5 хирург ЛНР-ни госпиталында чалышагъаны, яралангъанланы сав этип къутгъарагъаны 5 айдан да артыкъ бола. Олар оьзлер кёп сююп, гёнгюллю кюйде барып, шайлы кёмек этегенин айрыча язмагъа да тийишли. Оланы гьариси сыйлы орденлер, медаллар булан да савгъатлангъан.

Дагъыстанны савлукъ сакълав министерлиги нече йылны узагъында «Савлукъ сакълав» программагъа гёре, республиканы гьар ерлериндеги поликлиникаланы, больницаланы касбучулар булан таъмин этип иш гёре. Шолай касбучулардан гьисапланагъан­ алдынлы хирургланы бири Алиагьмат Алиев ва ону онг къолу йимик гьаракат этеген врач-хирург Равшан Къурбанов ЛНР-ни госпиталында гетген йылны февраль айындан берли нечесе яралылагъа табылгъан.

Бизин хирурглар шо заманны ичинде минглер булан яралангъан асгерчилеге операциялар эте, оланы оьлюмден къутгъаралар. Алиагьмат Алиев билдиреген кюйде, орта гьисапда госпитальгъа 100 адам яраланып тюше. Оланы гьар экинчисине операция этмеге тарыкъ бола. Аслу гьалда госпитальда гюлле яда топну яркъычлары тийип яраланагъанлар ята.

Ончакъы адамгъа операциялар этмеге, озокъда, оюн-масхара тюгюл. Къавшалмаймысыз деген соравгъа Алиагьмат Алиев: «Ярым йылны ичинде гечеси-гюню булан ишлей туруп, уьйренип къалгъанбыз», – деп жавап берди.