19-нчу октябрде Россияны Президенти В.Путинни указы булан Донецк ва Луганск халкъ республикаларда, шолай да Запорожск ва Херсон областларда дав агьвалатлар булан байлавлу чаралар (военное положение) билдирилген.
Артындагъы гюн Дагъыстанны Башчысы Сергей Меликов шо указгъа гёре, гьакимликни бары да бёлюклерини ёлбашчыларын къуршап генгеш оьтгерди.
С. Меликов указны охуду. Шо указ тувулунгъан ва болма имканлы гьаллагъа гёре чыкъгъанны да айтды. Дав агьвалатлар юрюлеген Россияны гьисабындагъы дёрт де региондан къайры, шо ерге ювукъ ерлешген Къырым республикада, Краснодар, Белгород, Брянск, Воронеж, Курск, Ростов областларда да тарыкълы ишлер юрюлюп тура.
Гьар федерал округда къоркъунчлу, орта ва башлапгъы гьазирлик чаралар гёрюлмекни гьакъында айтылгъан.
Темиркъазыкъ-Кавказ федерал округгъа башлапгъы (базисный) гьал билдирилген. Шогъар гёре гьакимиятлар халкъны аманлыгъын, жамият низамны, адамланы яшавуна тарыкъ аслу ва асгер идараланы террорчулукъдан сакъламакъ учун чаралар гёрме герек.
– Шо гьазирлик болдурув адамланы яшавуна пуршавлукъ яда четимлик этмежек, тек ерли гьакимиятланы жаваплыгъын артдыра, дазу бойланы сакълавну, адамланы аманлыгъын, шолай да асгерге мал болдурагъан къуллукъланы юрютеген идараланы сакълав гючленежек, – дей Сергей Меликов. – Шолай чаралар этебиз деп, адамланы яшавуна четимлик этип, гьатдан озуп гетме ярамай. Биз хас асгер гьаракатда ортакъчылыкъ этегенлени агьлюлерине этеген кёмеклер давам этиле, къошум ёлларын излеп де турабыз.
Сергей Меликов асгер бёлюклени, асгерчилени талаплары биринчилей кютюлме ва шо ишлер жамлашдырылма герекни де эсгерди.
Дагъыстанда жамиятны аманлыгъын ва адамланы къуллукъларын кютеген идараланы ишин къурумлу юрютегенге къарайгъан оператив штаб къурулажакъны айтды. Шогъар аслу гьалда Россияны къорув министерлигини, Ич ишлени, МЧС-ни, ФСБ-ни, Милли Росгвардияны ва Аманлыкъ советни вакиллери гирежек.
Сергей Меликов ёлбашчылыкъ этеген шо штабны тапшурувлары бары да ерли гьакимиятлагъа ва республикадагъы идаралагъа, шолай да ватандашлагъа сёзсюз кютюлме герекни гьакъында да билдирилген.
