Хоншунга от тюшгенде, ялыны сагъа да тиймей къалмас деген кюйде, коронавирус аврув Китайны дазуларындан оьтюп, гьалиги заманда Ер юзюндеги юзлер булангъы пачалыкълагъа яйылып барагъаны айлана якъда­гъыланы аманлыгъына, савлугъуна къоркъунчлукъ тувдурмай къоймай. Шону гьисапгъа алып, арт вакътилерде ООН-ну (Бирлешген Миллетлени Къуруму) савлукъ сакълавну масъалаларына къарайгъан бёлюгю савлай аламны къуршама белсенген аврувну алдын алывда ягъадан къарап турмайлы, бары да пачалыкълагъа гючлени бирлешдиривню кюрчюсюнде гьаракатын артдырмагъа таклиф этегени негьакъ тюгюл.

Шогъар байлавлу болуп РФ-ни Президенти Владимир Путин бу йыл март айны 18-нде Севастополь шагьарны ва Къырым ярыматавну халкъыны вакиллери булан болгъан ёлугъувунда эсгерилген масъалагъа байлавлу болуп уьлкебизни ватандашларыны савлугъун къорув мурат булан оьтгерилеген хас чараланы гьакъында баянлыкъ берди. Шо гюн Магьачкъалада РФ-ни Дагъыстанда иш гёреген МЧС-ни къыставуллу гьалланы алдын алагъан центрында ДР-ни Башчысы Владимир Васильев де республикабызны ва шолай да РФ-ни Дагъыстанда иш гёреген къурумларыны министерликлерини ва тармакъларыны башчылары, касбучулары булан айлана якъда тувулунгъан къыставуллукъну ёрукълашдырывгъа байлавлу хас гьакълашыв генгеш оьтгерди.

Элни авзу элекдир дегенлей, къыставуллу гьаллар тувулунагъан гезиклерде айлана якъгъа, билип -билмей деген кюйде, гьар тюрлю айтды-къойтдулар кёп яйылагъанын тергевсюз къоймагъа ярамай. Неге десегиз, айлана ягъыбызда шолай къоркъунчлу гьаллар тувулунгъанда, шондан оьз пайдасын ойлашып, малланы ва къуллукъланы багьаларын гьатдан оздуруп гётерип къазанч этмеге къарайгъан къурумлар да, айрыча ватандашлар да къаршылашмай къалмай.

– Оьз пайдасы учун къыставуллукъну болдура­гъан тайпалагъа къаршы ябушувда бизге барыбызгъа да байлавлукъда бирлешип иш гёрмеге тюше, низамны гери уруп, гьалны гьакитеген тайпалагъа къаршы такъсырлавну къатты кюйдеги къайдалары къолланажакъ, – деген В. Васильев генгешни ортакъчыларына оьзюню буварывунда. – Адамлар кёп жыйылагъан ерлерде ва шолай да дазу бойларда иш гёреген къуллукълагъа да къыставуллукъну алдын алывда гючлерин бирлешдирип чалышма таклиф этиле. Базарларда, тюкенлерде, тувулунгъан къыставуллукъну тергевсюз къоймагъа ярамай. Шо ишде биз ДР-ни муфтиятыны янындан да кёмек къаравуллайбыз.

Озокъда, бу савлай алам оьлчевюнде чечмеге тюшеген ортакъ масъала экени англашыла. Неге десегиз, шо кюйде дюньяны къаранап базарларыны ортакъчылары да гьалны къыйынлашдыра, тогъатартывну адилли юрютювге чатакъ салмагъа къарай. Шолайлыкъда, къаранапны багьалары тёбенлешдирилип, доллар ва евро валюталары гётерилип, Россияны манатыны учузлашыву багьаланы да булгъай.

Шогъар бойсынагъанлар да янгылыш бола. РФ-ни ва ДР-ни башчылары эсгерген кюйде, бизин уьлкебизде ва республикабызда коронавирусну алдын алывда бюджетлерде тийишли харжланы айырывну ва асувлу кюйде пайдаландырывну ёллары, имканлыкълары къолланмай къалмажакъ. Демек, бугюнню тангаласы да барны ойлашмагъа борчлубуз.

Тюзю, ери гелген сонг эсгермей къойма да бажарылмай. Тарихи сынав ташдырагъан кююнде, гьар не балагьны да оьзюню чыкъгъан еринде батдырма да тарыкъ бола.