25-нчи январда Дагъыстанны Башчысы Сергей Меликов тувра эфирде дагъыстанлыланы соравларына жаваплар къайтарды. 3 сагьатны ичинде ол оьзюне гелген 4500 соравну 35-исине жавап берди. Къалгъан соравлагъа да бугюнлерде къаралып тура.
Сергей Меликов жавап берген 35 сорав нечик кютюлген ва февраль айны башына нечеси яшавгъа чыкъгъан?
Зайыра Сулейманованы 4 йыллыкъ сакъат яшына кёмек этилген.
Гьайдакъ районну башчысы Алим Темирболатовну тапшурувуна гёре, сакъат яшгъа тарыкъ дарманлар ва сакъатлар учунгъу коляска алынгъан ва етишдирилген.
Къарабудагъгентдеги эрсиз 3 яшны анасы Белла Гьамзаеваны уьюне ювукъ вакътиде газ тартылажакъ. Районну башчысы Магьмут Амиралиев билдирген кюйде, бугюнлерде проект-смета документлер гьазир болуп битген.
Шамил районну Хебда юртунда яшайгъан сакъат адамгъа да хас медицина карават алынгъан ва уьюне етишдирилген.
Хас асгер гьаракатда ортакъчылыкъ этген ва шонда гечинген Шамил Гьажимуратовну аты буса Буйнакск районну Атланавулундагъы орамгъа тагъылгъан.
Далапчылыкъгъа ва инвестиция ишлени юрютеген агентликни вакиллери Сакинат Магьамматова булан ёлукъгъан ва яшавгъа чыгъарагъан кюйлени арагъа салып ойлашгъан.
Туристлени къабул этив проектни яшавгъа чыгъарма гьасирет далапчы Агьмат Магьамматовгъа да кёмек этилежек ва шону учун харжлагъан акъчасыны бир пайы къайтарылажакъ.
«Пальмира» деген микрорайонда буса сув токътайгъан масъалагъа къаралгъан ва тезлик булан шо ерде этилме герек ишлер башланажакъ.
Тувра эфирге зенг этген адамлар, оьзлер яшайгъан кёп къабатлы уьйлени алдындагъы абзарны онгарылмагъанны билдирген. Бу йыл шо абзарны да онгармагъа гёз алгъа тутулгъан.
Бабаюрт райондагъы Мисирби Гишиев сакъатлыгъын къайтара токъташдырмакъ учун шо масъалагъа къарайгъан бюрода оьзюнден урушбат алма сюегенге шеклик этегенин билдирген. Шо масъалагъа гёре де тергевлер юрюлюп тура.
