Чалтик оьсдюрюлеген майданлар дагъы да артажакъ

 

 

Алдагъы гюнлерде Дагъыстан Республиканы юрт хозяйство ва сурсат министри Мухтарбий Ажеков «Дагестан» деген маълумат агентлигинде журналистлер булан ёлукъду. Прес-конференцияда министр Дагъыстанда чалтик къайтарывну  ва къой сиривлени къыш-лыкъ отлавлукълагъа чыгъарывну гьакъында маълуматлар берди.

 

М. Ажековну айтывуна гёре, Дагъыстан Республика  Россияда чалтик оьсдюреген  тарлавланы майданларыны санавуна  гёре 2-нчи ерде ва артдагъы йылларда чалтикни  тюшюмю алда бир де болмагъандай артгъан.  Бизин респуб­ликада чалтик оьсдюрюв юрт хозяйство тармакъда инг де асувлу тармакъланы бири гьисаплана.

Чалтик оьсдюрювге бу йыл Дагъыстан Респуб­ликаны бюджетинден 1 миллиард манат харж гёрсетилген. Эсгерилген харж  республиканы юрт хозяйство тармагъыны оьсювюне шайлы болушлукъ этген.

Бу йыл умуми алгъанда Дагъыстанда 31, 6 минг  гектар ерде чалтик оьсдюрюлген ва гьар гектардан 49, 7 центнер тюшюм алынгъан. Гетген йыл буса гьар гектардан  алынгъан тюшюм 41 центнерден артыкъ  болмагъан. Бугюнлеге ерли  Дагъыстанда 150, 5 минг тон  чалтик топлангъан, йылны ахырына дагъы да 5-6 минг тон тюшюм алмагъа умут этиле. Умуми алгъанда бу йыл чалтикни тюшюмю 156 минг тон болажакъ деп къаравуллана.

Къой сиривлени къышлыкъ отлавлукълагъа чыгъа­рывну гьакъында айта туруп, министр Ажеков бугюнлеге ерли 1 миллион 200 минг малны  чыгъармагъа бажарылгъанны эсгерди. Олар кёбюсю гьалда Къызлар районда ерлешген отлавлукълагъа чыгъарылгъан.  Къалгъан  къой сиривлени де башгъа районлардагъы отлавлукълагъа чыгъарывну гьайы этиле.

 

П.БЕКЕЕВА.

 

Авторизация
*
*
Регистрация
*
*
*
Согласны с условиями сайта?
Генерация пароля