Оьтген жумада Тёбен Къазанышда Сали Сулейманны атындагъы спорт комплексде чалт ойнайгъан шагьматлардан Дагъыстанны кубогуну 3-нчю даражасыны ярышлары оьтгерилди. Халкъара гроссмейстер Жакъай Жакъаевни савгъатын алмакъ учунгъу шо ярышлар хас асгер гьаракатны ортакъчыларына багъышлана эди.
Жакъай Абакарович Жакъаев − оьзю де тёбенкъазанышлы, Дагъыстанны 16 керен чемпиону. Шолай да, ол кёп керенлер Къыбла ва Темиркъазыкъ- Кавказ федерал округланы, Бютюнроссия, халкъара турнирлени утгъан. Дагъыстанны ат къазангъан тренери, онлар булан уьлкени оьлчевюндеги чемпионланы уьйретген.
Жакъай Дагъыстанны шагьматларыны федерациясыны президенти, тахшагьардагъы А.Карповну школасыны директору да дюр.
Эсгерилген турнирде 16 муниципалитетден гелген 80 спортчу ортакъчылыкъ этди.
Эки гюн юрюлген ярышларда Къызлар шагьарлы Залимхан Алиев биринчи, Новолак райондан гелген Жохар Шайхалиев экинчи, уьчюнчю ерни де магьачкъалалы Элдар Магьамматов алды.
Кадетлени арасында инг де яхшы натижалагъа Асгьап Сулейманов ва Амина Айдиева етишдилер. Яшёрюмлерден − Магьамматкамил Магьамматов ва Хадижа Магьамматова, ветеранланы арасындан буса Агьмат Хасболатов инг яхшы шагьматист деп къыйматланды.
Савлугъу осалланы арасында буса Магьач Абдулвагьаповгъа етеген болмады. Утгъанлагъа кубоклар, дипломлар, медаллар ва акъча савгъатлар берилди.
