Июн айны биринде Дагъыстан Республиканы Башчысы Сергей Меликов ДР-ни бирикген бюджетин артдырывну масъалаларына къарайгъан комиссиясыны генгешин оьтгерген. О гьакъда регионну ёлбашчысыны прес-къуллугъу билдире.
Генгешни ача туруп, Сергей Меликов халкъны яшавун яхшылашдырмакъ, яшавлукъ-экономика оьсювюн болдурмакъ учун бюджетни асувлугъуну гьакъында эсгерген. Гьалиги вакъти, айрокъда пачалыкъ санкциялагъа тарыгъан заманда, бюджет топлавну масъалалары тюзевлю къайдада чечилме тарыкъны айтгъан.
Регионну бирикген бюджетине налоглардан ва налогларсыз да тюшеген харжны артдырмакъ учун плангъа гёре этилме герекли тапшурувланы кютюлеген кюйлерине байлавлу Дагъыстан Республиканы Гьукуматыны Председателини биринчи заместители Руслан Алиев чыгъып сёйлеген. 2022-нчи йылны 4 айыны гьасиллерине гёре тапшурувланы 100 процентге толтурма бажарылгъан. Бюджетге 16,5 миллиард манат акъча гелген. Бары да муниципалитетлерде гьал бир йимик тюгюл. Руслан Алиев оланы арасында гьасиллери осалларын да эсгерип айтгъан.
Дагъыстан Республиканы бирикген бюджетин артдырмакъ учун яшавгъа чыгъарылып турагъан ишлени гьакъында да Федерал налог къуллукъну республикадагъы управлениесини начальнигини къуллукъларын заманлыкъгъа кютеген Нурулла Хизриев генгешни барышында чыгъып сёйлеген. Ол англатгъан кюйде, управлениени де, муниципалитетлени де бир-бирин англап этилеген иши асувлу болсун учун гёз алгъа тутулгъан чаралар яшавгъа чыгъарылажакъ.
Оьзлени тармакъларына гёре юрюлеген гьаракатланы гьакъында да Суд приставланы федерал къуллугъуну республикадагъы управлениесини ёлбашчысыны борчларын заманлыкъгъа кютеген Магьамматрасул Абдусаламов, ДР-ни прокуроруну биринчи заместители Руслан Ляпин баянлыкълар берген
.
Транспорт налогланы жыйылывуну гьакъында эсгере туруп, регионну ёлбашчысы Сергей Меликов муниципалитетлер о налогну жыйылывуна гёре айрыча иштагьланыв булан янашма герекни айтгъан. Неге тюгюл, жыйылгъан харж къайтып олагъа геле. Шо акъчагъа ерлерде ёлларын онгарма бола.
Генгешде чыгъып сёйлегенлени арасында Дагъыстан Республиканы Гьукуматыны Председателини заместители – ДР-ни топуракъ ва мюлк министри Завур Эминов да болгъан. Ол билдирген кюйде, министерлик муниципалитетлер булан этилме герекли къуллукъланы яшавгъа чыгъарылывуну масъалаларына байлавлу иш юрюте. Дагъыстанда шо министерликге гиреген объектлени санаву 2 миллионгъа етише. Оланы кёп яны гьисапгъа алынмагъан.
Гьисап палатаны председатели Билал Жагьбаров билдирген кюйде, тергевлени натижаларын чыгъаргъанда, топуракъланы арендагъа алагъанланы арасында да гьисапгъа алынмагъанлары арагъа чыгъа. Бирлерин буса башгъа адамлар къоллай.
Генгешни тамамлай туруп, Сергей Меликов бирикген бюджетни артдырмакъны агьамиятлыгъын бирдагъы керен эсгерген.
Набиюлла МАГЬАММАТОВ.
