Яшлар баву – оланы къонгурав кюлкюсю чалынагъан сигьрулу дюнья. Мунда яшлар бир-бири булан гьаллашма уьйренегенден къайры да, язма, санама ва охума башлай. Яшлар баву – къайсы яшны да гиччи дюньясы. Яшлар бавунда оланы юреги булан сюеген ва барына да бир йимик янашагъан адам ишлеме герек.
Солтан Янгыюртда шолай адамланы бириси «Дюймовочка» деген яшлар бавуну заведующийи Бурлият ГЬАЖАМАТОВА да ишлей.
– Юртда яшлар баву 1970-нчи йылда ачылгъан, шонча йылдан берли тарбиялавчулар яхшы сынав топлагъан, – дей Бурлият Арсланалиевна. –Бугюнлерде коллектив бир агьлю йимик татувлу тура, пайдалы ишлей ва бизден алда ишлегенлени бай сынавун къоллай. Биз яшлар баву къурулагъанда, сонг ишлейгенде къыйын тёкген заведующийлени унутмайбыз. Загьра Магьмутовна Давутова, Ума Абдурагьмановна Пашаева, Ниъматханым Багьавутдиновна Гьажиева – булар оьр даражадагъы ёлбашчылар эди. Биз олагъа ошама къарайбыз. Шолай да, гиччипавланы тарбиялап оьзлени оьмюрюн йиберген Александра Замкиеваны, Зугьра Мамаеваны, Патина Гьасанованы, Зумурут Алханованы, Маржанат Сулееваны, Зугьра Алиеваны, Хатима Гьажиеваны, Хадижат Магьамматованы, Жагьбат Манапованы, Хусунун Болатханованы ва Зугьра Муртазалиеваны атларын уллу гьюрмет булан эсгеребиз…
Озокъда, шо замандан берли кёп йыллар оьтген. Яшлагъа школагъа баргъанча билим береген бу идара онгача иш гёре, гёрсетив матагьлары артгъан ва яхшылашгъан.
2004-нчю йылда эсгерилген яшлар бавуна заведущийи этилип Бурлият Арсланалиевна Гьажаматова белгилене. Ону бажарывлугъу биринчи гюнлеринден тутуп гёрюне. Коллектив, яшланы ата-аналары ва далапчылар булан бир тил тапма бажаргъан. Ону бажарывлугъу булан 2012-нчи йылда юртда эки къабатлы яшлар баву ачыла.
Яшлар бавунда 200 яш тарбиялана, гезигин гёзлеп токътагъанланы санаву 600-ге етише. Уллу юртгъа шо азлыкъ эте, шону учун да бирдагъы 200 яшгъа ери булангъы янгы яшлар бавун къурма гёз алгъа тутулгъан ва «Дюймовочка» деген яшлар бавуна 80 гиччипавгъа ери булангъы къошум къурулуш этме де сёз берилген.
–Яшлар бавунда ишин де, яшланы да юреги булан сюеген адамлар болмаса, тарбиялав ва билим берив осал болар, – дей Бурлият Гьажаматова. – Шо яндан алгъанда бизин яшлар бавубузгъа методистибиз Дагьират Сайдуллаева гелип уллу пайда болду. Яшлар бавунда тарбиялавну янгы къайдалары къоллана. Олар къайсы адамны да билим алывуну кюрчюсю яшлар бавунда салынагъанны англайлар. Олар яшлар баву булан яшайлар.
Музыка яндан алгъанда, Муслимат Магьамматгьажиева, физкультурадан Альбина Шабазова дарсларын бек арив юрюте. Олар яшлар булан оьтгереген гиччирек концертлерине, спорт ярышларына ата-анасын чакъыралар ва оланы насигьатларына тынглап ишлейлер.
Биз де «Дюймовочка» яшлар бавуну коллективине дагъы да уллу уьстюнлюклер ёрайбыз ва яшланы кюлкюсю таймасын деп айтма сюебиз.
