Май айны башлапгъы гюнлеринде Ставраполь крайдагъы Минеральные Воды деген шагьарны гьар тюрлю выставка чаралар оьтгерилеген майданында «МинводыЭКСПО» деген инвестиция форуму оьтгерилген. Форумда ортакъчылыкъ этген РФ-ни Гьукуматыны Председатели Михаил Мишустин Дагъыстанны выставка бёлюгю булан ювукъдан таныш болгъан.
Шондан сонг Михаил Мишустинни ва ДР-ни Башчысы Сергей Меликов булан ёлугъуву болгъан. Бизин республикабызда яшавгъа чыгъарылагъан инвестиция проектлени гьакъында баянлыкъ алгъан сонг, РФ-ни премьер- министри гележекде де агьамиятлы милли борчлар пачалыкъны янындан тергевсюз къалмажагъы гьакъда билдирген.
–Темиркъазыкъ-Кавказ федерал округну бир региону да гележекде кёмексиз къалмажакъ, – деген Михаил Мишустин. – Озокъда, Дагъыстанда да маячыланы харжлары йимик, пачалыкъ маялар да яшавлукъ-экономика масъалаланы ёрукълашдырывда асувлу кюйде къолланмагъа тюше.
Ёлугъувну барышында Сергей Меликов да Россияны Гьукуматыны Башчысына алда токътагъан борчланы яшавгъа чыгъарылагъаны гьакъында билдирген. Гележекде этилмеге герекли ишлени гьакъында айта туруп, ол бизин республикабызда артдагъы вакътилерде промышленностну, АПК-ны, туризмни тармакъларыны оьсювюне тергев артажагъы гьакъда эсгерген.
– Биринчилей мен сизге республиканы алдында токътагъан борчланы яшавгъа чыгъармакъ учун РФ-ни Гьукуматыны янындан этилинеген кёмекге разилигимни билдирмеге сюер эдим, – дей Сергей Меликов. – Бизин республикабызда артдагъы йылларда гьар адамгъа тиеген умуми малланы къадары арта. Шо да янгы иш ерлер ачылагъаны булан тыгъыс кюйде байлавлу. Къоллавчуланы талапларын гьисапгъа алып, уллуланы ва гиччилени яшавлукъ шартларын яхшылашдырмакъ муратда юрюлеген гьаракат да давам этиле.
