Муаллим касбуну ким де танглап болмай, неге тюгюл ону сайлагъан адам назик гьисли, асил, таза юрекли болмагъа герек. О касбу адамны жанындан чыгъа. Эгер гиччиден берли муаллим болмакъ юрекге синген буса, шо заманда ол гьакъ юрекден ишлеп бажаражагъы герти зат. Яшлар, айрокъда, башлапгъы класдагъылары, оьзлеге бакъгъан сюювню тазалыгъын бек гьис этелер. Олар муаллимни ушатса, ону экинчи анасыдай гёрюп, гьатта, анасына айтмайгъан сырларын да огъар айталар.

 

Шолай бары да яшны юрегине сингип бажаргъан муаллим булан сизин таныш этмеге сюебиз. Ол 37 йылны узагъында оьзю кёп сююп танглагъан касбусунда ишлеп тура.

Мадинаханум Пейзулаевна Тулпарханова 1966-нчы йылда 1 номерли Львовское юртда тувгъан. 1982-нчи йылда ата юртундагъы орта школаны 8 класын битдирип, Хасавюртдагъы педагогика училищеге охумагъа тюшген. 1986-нчы йылда, ону тамамлап, «Гюнеш» деген яшлар бавунда ишлеме башлай.

Мадинаханум орта билим алып токътамай, 1987-нчи йылда Дагъыстан пачалыкъ педагогика институтда ишинден айрылмай охуй. Шо йыл Янгы Къарадагъы орта школагъа пионервожатый болуп чыкъгъан. 1992-нчи йылда эсгерилген институтну битдирген ва башлапгъы класлагъа дарс береген оьр билимли муаллим болгъан.

1988-нчи йылда Мадинаханум Пейзулаевна Бабаюртдагъы орта школа-интернатгъа ишлемеге гелген. 1991-нчи йылдан бугюнге ерли буса ол Бабаюртдагъы бир номерли орта школада башлапгъы класланы муаллими гьисапда загьмат тёге.

Оьзю ишлейген йылларда М. Тулпарханова кёп охувчуну сюю­вюн къазангъан. Яшлагъа башлапгъы класларда охув якъдан нечик кюрчю салынгъан буса, оьр класлагъа чыкъгъанда шо беклеше ва охувчулар билимли, гьакъыллы бола. Мадина Пейзулаевна гьар яшны охувну терен сырларына тюшюндюрген. Ону яшларыны кёбюсю оьр охув ожакъланы битдирип, арив ерлерде ишлеп туралар. Мадина Тулпарханованы бир де къашларын тююп, къарсалап бирев де гёрмеген. Терс иш этген яшгъа да сабур-саламат кюйде анг­лата. Яш муаллимлеге насигьатлар берип, топлангъан бай сынаву булан гьакълаша.

Ол оьсюп гелеген яш наслуну тюз тарбиялавда ва билим беривде етишген уьстюнлюклери саялы район администрацияны гьюрметлев грамоталары булан савгъатлангъан. 2009-нчу йылда огъар школаны администрациясыны «Инг тизив муаллим» деген диплому тапшурулгъан. Гетген охув йылда Мадина Пейзулаевнагъа «Дагъыстан Респуб­ликаны билим беривюню отличниги» деген ат да берилди.

Мадина ишинде йимик, уьюнде де бек сабур, илиякълы, оьзюню яшларына да ол бек исси сёйлей. Агьлюсю булан бирге олар эки улан ва бир къызны тарбиялагъанлар. Олагъа оьр билимлер берген ва гьарисин тюз ёллагъа салып бажаргъан. Бугюнлерде – Мадина Пейзулаевна насипли ана ва уллана. Ол авлетлерини яшларындан сююнюп яшай.

Биз Мадина Пейзулаевнагъа савлукъ, оьзюню йылы сёзлери булан охувчуланы дагъы да сююндюреген кюйде узакъ оьмюр ёрайбыз.

 

Гёзел ГЬАСАНОВА,