Сонг «Анжи» эс тапды,оюнну он уьчюнчю минутунда Магьаммат Митришев, «Динамону» якълавчусун да алдатып, оюнну санавун ачды. Шо гол гирген мюгьлетден тутуп, оюн битгинчеге бизинкилер питерлилеге дагъы бизин майдангъа «еси»  болуп, оюнну башында йимик сюйген къайдада айланмагъа къоймады.

Оюнну йигирманчы минутунда Амаду Мутари гьилла этип, майданны ортасындан оьзюне гелген топну Антон Арсеньевни къапусуна бакъдырып, экинчи гол гийирди.

Йигирма тогъузунчу минутда кёп сийрек  чапгъынларыны бирисинде «Динамону» чапгъынчысы Максим Андреев, бизин орта якълавчубуз Расим Тагьирбековну хатасындан пайдаланып , Кержаковгъа  гол гийирди. Бизге гийирген голундан сонг, питерлилер бираз жанланып, дагъы да чапгъынлар этме де къарады, тек бизин якълавчулар дагъы олай хаталар этмеди. Шолайлыкъда, биринчи тайм битди.

Танапусдан сонг да «Анжи» оюнну «югенлерин» оьзюню къолундан чыгъармай, бир де футбол майданны сол янындан, бир де онг янындан  чапгъынларын давам этип турду. Тек, не этерсен, бирини артындан бири болагъан къоркъунчлу мюгьлетлени къолдан чыгъарып турду.

Бизин командада Амаду Мутари ва Илья Максимов башгъа футболистлерден айрыча гючлю гёрюне эди. «Анжини» бары чапгъынлары шу эки де футболистден таба къурула эди. Шолайлыкъда, оюнну етмиш сегизинчи ва сексен тогъузунчу минутларында Илья Максимов питерлилеге дагъы да эки топ гийирди.

Оюнгъа гёрсетилген токъсан минутгъа судья Артём Чистяков къошгъан уьч минут да битди дейгенде, Амаду Мутари къонакълагъа бешинчи топну гийирди. Оюн 5:1 санав булан тамамланды.

«Оюнну санаву чу яман тюгюл, тек футболистлеримни алдына салагъан мени кёп талап­ларым бар»,  – деди оюн битгенде береген баянлыгъында «Анжини» баш тренери Сергей Ташуев. Дагъы да Ташуев якълавчулар этеген хаталаны ва чапгъынчылар этеген хаталаны уьстюнде ишлеме герекни де айтды.

Къонакъланы баш тренери Виктор Демидов буса бугюн оьзюню командасындан «Анжи» гючлюге мюкюрлюгюн билдирсе де, оьзлер  бугюнгю оюнну санавуна гёре «Анжиден» айтардай осал гёрмейгени гьакъда билдирди.

Не болса да, бизин «Анжи», алты оюндан сонг он уьч очко да къазанып, къайтып турнир таблицаны башына ес болду.

Шарапутдин КИШИЕВ.

СУРАТДА: Магьаммат Митришев оюнну

санавун ача.