Дагъыстанны Башчысы Сергей Меликов ишчи сапар булан Азербайжан Республикагъа баргъан. Сапарны экинчи гюнюнде С.Меликов хоншу пачалыкъны стратегия объектлери ва алдынлы предприятиелери булан таныш болгъан. Гележекде бирче иш гёрювню масъалаларына айрыча тергев берген.

Бир башлап регионну ёлбашчысы Бакюде сатыв-алыв халкъара денгиз портунда болгъан. Порт Европаны Азия булан байлайгъан уллу борчланы кюте. Ону директору Талегь Зиядов англатгъан кюйде, къурулуш ишлени биринчи гезиги 2018-нчи йылда тамамлангъан. Шогъар гёре портда йылда 15 миллион тон малланы, 100 мингге ерли кантейнерлени юклеме яда бошатма имканлыкъ ачылгъан. Гелеген йылны орталарына таба контейнерлени санаву 500 мингге ерли артажакъ.

Сергей Меликов Бакю порт­ну умпагьатлыгъын айта туруп: «Дюнья экономиканы таъсири булан Уллу чилле ёл янгыдан тувма болагъандай гёрюне. Юк ташыв арта, базарлар алышына, Каспийден таба юрюлеген сатыв-алыв бек тарыкълы бола бара», – деп билдирген.

Шо гюн Сергей Меликов Бакю портну къырыйында ерлешген эркин экономика зонаны имканлыкълары булан да таныш болгъан. Ону ёлбашчысы Валегь Алескеров билдиргени йимик, мунда логистика центрлар къурулгъан, гьар тюрлю проектлер яшавгъа чыгъарыла.

Сапарны барышында Дагъыстан Республиканы Башчысы Сергей Меликов Бакю шагьарда гемелер къурагъан заводда да болгъан. Завод 2011-нчи йылда ишлеме башлагъан. Шо вакътиден берли 10 геме къурулгъан. Гемелени ярашдырыв ва янгыртыв булан байлавлу 170 проект яшавгъа чыгъарылгъан.

Сапарны тамамлай туруп, Сергей Меликов Дагъыстан Рес­публиканы Азербайжан Республикадагъы Вакиллигини къуллукъчулары булан да ёлукъгъан. Олар юрютеген гьаракатгъа баракалла бере туруп, янгы масъалаланы чечиливюне де шолай агьамиятлы тергев берме чакъыргъан. Эки гюнню ичинде Азербайжан ва Дагъыстан гьар тюрлю ёлларда къабул этилген дыгъарлагъа гёре эки де янгъа пайдалы иш юрютюп, экономика оьсювню болдуражакъгъа шеклик этмейбиз.