Ата борчун унутгъан

 

 

Судлукъ приставланы федерал къуллугъуну Дагъыстан управлениесини маълумат бёлюгю билдиреген кюйде, республикада гьакъылбалыкъ болмагъан яшларына алиментлени тёлемей, яшынып турагъан ерин, ишин алышдырып айланагъан 7321 адам бар.  Оланы авлетлерини алдындагъы умуми борчу 1,2 миллиард манатгъа етишген.

 

Артдагъы вакътилерде управление бакъдыргъан материаллагъа гёре, судлар 402 уголовный ишге къарагъан, 8 адамгъа къаршы эркинликден магьрюм этмек деген къарар чыгъаргъан.

Мисал учун, магьачкъалалы А. Алибу­таев­ни айрылгъан къатынындан уьч яшы бар. Лап уллусу 5-нчи класгъа юрюй. Озокъда, къатынгишиге оланы янгыз сакълама, оьсдюрме  оьтесиз къыйын.  А.Алибутаев агьлюсюне кёмек этейим деп бир де къарамагъан. Башгъа регионгъа гёчюп, ишге тюшюп, гьатта паспортун да алышдырма бажаргъан. Тек шогъар да къарамай, судлукъ приставлар хыйлы ахтарывлардан сонг ону янгы турагъан­ ерин токъташдыргъан.

Ол тутулгъан ва судну тёресине гёре,  огъар энниден сонг алиментлени туснакъдан таба тёлемеге тюшежек. Ондан къайры, ону ихтиярындагъы машин де чыгъарылып алынгъан. Машин аукционда сатылгъан сонг, акъчасы агьлюсюне ва яшларына бакъдырылажакъ.

 

Алав АЛИЕВ.

 

Авторизация
*
*
Регистрация
*
*
*
Согласны с условиями сайта?
Генерация пароля