Дагъыстандагъы топуракъланы 85 проценти юрт хозяйство агьамияты булангъы ерлер санала. Савлай Россияда буса шо да 22 процентден оьтмей. Бизин аграр республикабызда топуракъ байлыкъларыбызны имканлыкълары некъадар асувлу кюйде пайдаландырыламы?
Соравгъа тёбенде ДР-ни юрт хозяйство ва сурсат министри Мухтарбий Ажеков жавап бере:
– Озокъда, юрт хозяйство техника етишмей буса, топуракъланы уллу майданларда асувлу кюйде ишлетмеге четим бола. Муна шо саялы да бизин республикабызда арт вакътилерде юрт хозяйство машинлени гьар тюрлю жураларын болдурувгъа айрыча тергев бакъдырыла.
Оьтген йыл десенг, ДР-ни Гьукуматыны сиптечилиги булан Дагъыстанда «Кавказ» деген федерал ёлну ягъасында техника парк къурмакъ муратда Беларуссиядагъы «МТЗ» заводну башчылары булан сёйлешилип дыгъар этилинди. Шо да гележек учун инамлыкъны тувдура.
2022-нчи йылда Дагъыстанны аграр тармагъыны гьажатлары учун 632 миллион манатгъа 300 тюрлю-тюрлю техника машинлер алынды. Шо да 2021-нчи йыл булан тенглешдиргенде 17 процентге артыкъ бола.
Гьалиги заманда юрт хозяйство маллар оьсдюрегенлеге техниканы багьалары учуз токътамай. Шо саялы, арадан заман оьтюп, къайтарылгъан тюшюмню хайырындан толу кюйде тёлежекге аграр лизинг булан техника алмагъа имканлыкълар яратылына. Оьтген йыл шо гьакъда ДР-ни Башчысы Сергей Меликовну сиптечилиги «Росагролизинг» булан разилешивге гелме кёмек болду.
Дагъыстанны аграр тармагъыны имканлыкълары уллу. Лап да аслусу, баш байлыгъыбыз – топуракъ. Топуракъ байлыкъларыбызны асувлу кюйде къолламагъа тарыкъ. Ишлени машинлешдиривню натижасында оьтген йыл дагъы да 12 минг гектар майданны ишлетмеге имканлыкълар яратылынды. Натижада, бу йыл да 372 гектар ердеги чачыв учун сюрюлеген майданланы асувлу кюйде къолламагъа умут этилине.
Шолайлыкъда, йыл сайын юрт хозяйство къуллукъчуланы алдына салынгъан борчлар артыгъы булан яшавгъа чыгъарыла. Дагъысын айтмагъанда, 2022-нчи йылда агропромышленный тармакъда 190 миллиард манатны оьлчевюндеги гьар тюрлю юрт хозяйство маллар болдурулду ва къоллавчуланы талаплары учун сурсат аманлыкъгъа пайдаландырылды.
