Бабаюрт районда асгерге бармагъа чагъы етишген яшёрюмлени район военкоматына чакъырыв узатыла. Артдагъы гюнлерде, савлугъу тергелип, докторланы комиссиясындан чыкъгъан сонг, 9 улан Россияны асгерини сыдраларын толумлашдыражакъ.
Шо агьвалатгъа байлавлу болуп чакъырылгъан яшёрюмлени ёлгъа салмагъа деп, военкоматны абзарында оланы ата-аналары, ювукъ адамлары, дос-къардашлары ва къурдашлары жыйылгъан эдилер.
Дагъыстанлы уланлар учун Ватанны алдында борчун кютюв уллу оьктемлик бола гелген, неге десе де олар халкъына парахат яшав болдуруп, элин якълама баралар. Бир вакътилерде асгерге барма сюйсе де бажарылмай къалгъан гезиклер кёп эди. Гьали буса тарихни о бети ябылгъан, чагъы етишген гьар улан Россияны Савутлу Гючлерини сыдраларына къошулуп бола.
Шо гюн асгерге янгы чакъырылгъанланы ювукъ адамлары булан бирге, оланы ёлгъа салмагъа район администрацияны АТК-сыны ёлбашчысы Абдулла Черивмурзаев, давну ва загьматны ветеранларыны советини председатели Абусалим Абсаламов, районну жамият палатасыны пред-седателини орунбасары Герейхан Гьажиев де гелген эдилер.
Асгерге чакъырывну гьакъында айта туруп, районну асгер комиссары Даниял Дибиров, асгерге чакъырыв чара плангъа гёре оьтгерилегенни, юрюлюп турагъан хас дав гьаракат булан ону бир байлавлугъу ёкъну да эсгерди.
«Сонг да, асгерге чакъырылагъанлар Россияны янгы къурулгъан регионлары Донецк ва Луганск халкъ республикаларына, Запорожск, Херсон областлагъа да йиберилмежекге яшланы ата-аналарын инандыраман», – деди Даниял Дибиров.
Шо гюн военкоматны абзарындагъы жыйын уллу байрам чарагъа айланды. «Тангчолпан» деген Россияны халкъларыны мердешли маданият центрыны къуллукъчулары къужурлу концерт программа гёрсетдилер.
Армиягъа чакъырылгъан яшланы бийивлери, аналаны гёзьяшлары, аталаны ва уллу агъаланы насигьатлары… Савболлашыв…
Сонгунда олар республика жыйылыв пунктуна гетдилер. Ондан таба асгерлик бёлюклеге йиберилежек.
