Гьар йыл язбаш ва гюз айларда Россияны оьзге регионларында йимик, бизин республикада да асгер къуллугъун башлама жагьил яшлар военкоматлагъа чакъырыла. Россияны Президенти Путинни къолу салынгъан Указда бу йыл асгерге 18-ден 27 йыллыкъ чагъындагъы – 147 минг яш бизден чакъырыла.

Дагъыстанда да военкоматлар шо ишге гиришген. Чакъырыв июль айны 15-и болгъунча юрюлежек.

Гетген арбагюн «Дагъыстан» маълумат агентлигинде республиканы асгер комиссары Дайитбек Мустафаев журналистлер булан ёлугъув оьтгерди. Ол эсгерген кюйде, асгерге янгы къабул этилген яшлар дав юрюлеген Донецк, Луганск республикаланы ва Херсон, Запорожск областланы дазу бойларына да йиберилмежек. Украина бойда юрюлеген асгер операцияда чы дагъокъ да ортакъчылыкъ этмежек.

Дагъыстанны асгер комиссары англатгъан кюйде, бу йыл язбашда республикадан 4 минг яш чакъырылажакъ. Чакъырылагъан яшлар учун асгерде къуллукъ этмек бек сыйлы борч деп гьисаплана. Ондан къайры да, жагьиллени кёп яхшы хасиятлагъа уьйрете. Демек, Ватангъа аминлик сакълап, патриот ругьда тарбиялана. Жагьил уланны къаркъарасы да чыныгъа. Олай далиллени кёп гелтирме бола.

Россияны Пачалыкъ Думасында заманлыкъ асгерге алынажакъ яшланы 18 йылдан 30 йыллыкъ чагъында чакъырмакъ деген пикругъа агьамият бериле.