Бабаюрт районну башчысы Даниял Исламовну тапшурувуна гёре, районну асгер комиссары Даниял Дибиров, «БИЗ БИРЧЕБИЗ» деген штабны ёлбашчысы Арслан Далгьатов, Адил Янгыюртну юрт администрациясыны башчысы Ашарапудин Исламов, районну жамият палатасыны ёлбашчысыны орунбасары Герейхан Гьажиев ва оьзге активистлер бизин райондан асгерге чакъырылгъанлар гьазирлик гёреген Мычыгъыш республиканы Калиновская деген станицасындагъы асгер бёлюкге барып гелдилер.

Асгер бёлюкге бирдагъы керен бармакълыгъыны аслу мурады – Бабаюрт район­лу яшлагъа къысмалар, юхламакъ учунгъу къаплар, хуржунлар, дав тактикалы белбавлар, исси этиклер, тёшеклер, папахлар, къолгъаплар, ич опуракълар, гьасиликалам, давда тарыкъ болажакъ бары да затны етишдирмек эди. Шолар бары да район администрациясы асгер комиссариатны талабына гёре алынгъан эди.

Асгерге чакъырылгъанлагъа хас жыйымланы тапшурагъанда, районну вакиллери асгерге ча­къырылгъан уланлагъа савлукъ, уьстюнлюк, сав-саламат ожакъларына, агьлюлерине къайтмакъны ёрадылар.

Бабаюрт районну асгер комиссары Даниял Дибиров асгерге чакъырылгъанлагъа йылы сёзлер айтды ва эргишилеге не заманда да Ватанын якъламакъ борч болуп гелгенни, гьалиги заманда шо борч бизин уланлагъа да тюшгенни эсгерди.

Гезиги гелгенде асгерге чакъырылгъанлар районну башчысы Даниял Исламовгъа олагъа этеген тергевю ва ругьландырыву учун разилигин билдирдилер.
– Бугюн биз оьз районубуз булан оьктем болмагъа болабыз. Неге тюгюл, бизин район­ну йимик кёмеклешеген ва бизге ругь береген дагъы бир район да ёкъдур деп эсиме геле. Шо якъдан бизин асгер ёлдашларыбыз бизге бираз гюнчюлюк этеми экен деп эсибизге геле. Биз оьз уьлкебизни, районубузну гьар заманда да якълажакъбыз. Душмандан уьст болуп оьктем кюйде ­уьстюнлюк булан кёп сюеген Бабаюрт районубузгъа къайтып гележекбиз, – деди тамазатёбели гёнгюллю кюйде асгерге гетген Тимурхан Аттутаров.

СУРАТДА: Бабаюрт районну вакиллери асгерге чакъырылгъанлар булан.