Россияны Савутлу Гючлерини сыдрасына асгер къуллукъ кютмек учун гюз вакътидеги  чакъырыв бу йыл октябр айны 1-нден тутуп 31-нчи декабрге ерли узатылажакъ. Шогъар байлавлу Оборона Министерлигини янындан берилген буйрукъгъа гёре, ерлерде асгерге чакъырыв давам этиле.

 

ДР-ни Къызылюрт шагьаргъа, Къызылюрт ва Хумторкъали районлагъа къарайгъан военный комиссариатында асгерге чакъырылагъанланы санаву арта десек, янгылыш болмасбыз.

Артдагъы гюнлерде де мунда жанланыв гьис этилди. Дейгеним, Магьачкъалада ерлешген асгерге чакъырыв пунктуна бакъдырылгъан жагьиллени арасында Хумторкъали райондан асгерге чакъырылгъанлар да бар эди. Къоркъмаскъалалы къумукъ уланлар Нурали Гьюсейнов, Абубакар Гебеков, Алмалыдан Мурат Сулейманов, Гьажидада юртдан Магьаммат Ичакъаев, Уьчгентден агъа-инилер Мурат ва Муслим Расуловлар армиягъа гёнгюллю кюйде барагъаны аян болду.

Къызылюрт районну Чонтавул юртундан Зайналабит Салаватов да гёнгюллюлени сыдрасына къошулду.

Военный комиссар Шейхсайит Магьамматов бизин дагъыстанлылар намуслу кюйде асгер къуллугъун кютегенини гьакъында айта туруп, алдына салынгъан борчлагъа намуслу кюйде янашагъанын эсгерди.

Асгер къуллугъун кютмек учун белсенген уланлагъа яхшы ёл ёрай туруп, эсен-аман къайтмакъны ёрайбыз.

 

Алибек САЛАВАТОВ.