Адатланып къалгъанына гёре, гьар йыл язбашда ва гюзде яшёрюмлени асгерге чакъырывгъа байлавлу чаралар оьтгериле. Яшёрюмлени арасында, оланы асгерде къуллукъ этме гьазирлигин тергемек муратда ярышлар да юрюле.
Бу гезик де Къызылюрт шагьарны, Къызылюрт ва Хумторкъали районланы школаларыны охувчулары путлукъну гётеривде, турникде тартылывда ва еринден мезгилге атылывда гючюн сынадылар. Чинкдеси, Хумторкъали районну охувчуларыны чыгъышы да гёрмекли болду. Айтагъаным, оланы жыйым командасы ярышланы гьасиллерине гёре 2-нчи ерни алды. Алмалы юртдан биринчи номерли орта школаны охувчусу Аюп Жаватов лап яхшы натижаны гёрсетме болду. Ол путлукъну гётеривде биринчи ерни къазанма бажарды.
Эсгерилген чарада Хумторкъали районну башчысыны заместители Марат Жанбалов, шо районну билим берив управлениесини ёлбашчысы Магьамматжамил Агъалаев, Афгъанистанда асгер борчун кютген, Къызылюрт шагьар администрациясыны заманлыкъгъа борчларын кютеген башчысыны ойчусу эндирейли Къанболат Салавов, запасдагъы подполковник муцалавуллу Агьмат Гьюсейнов, шавхалянгыюртлу Исрапил Жапаров ва оьзгелери ортакъчылыкъ этдилер.
Асгер чагъына етишген яшёрюмлени алдында ДР-ни Къызылюрт шагьар, Къызылюрт ва Хумторкъали районларыны военный комиссары Шейхсайит Магьамматов, Хумторкъали районну башчысыны заместители Марат Жанбалов, Афгъанистанда асгер борчун кютгенлени атындан Дада Гьажиев ва запасдагъы подполковник Агьмат Гьюсейнов чыгъып сёйледилер. Яшёрюмлеге оьзлени намуслу кюйде тутмакъны тапшурдулар.
Ахырында алдынлыкъны алгъан командаланы ортакъчыларына ва оьзлени яхшы бажарывлулугъун гёрсетгенлеге грамоталар, дипломлар ва савгъатлар тапшурулду.
Алибек САЛАВАТОВ.
