Бизин уьлкебизде базар аралыкълар оьмюр сюреген девюрде далапчылыкъны оьсдюрювге къошум этмек учун ерли гьакимлик ва тергевлер юрютеген пачалыкъ, жамият къурумлагъа борчларына намуслу кюйде янашма тюше.
Айтмагъа сюегенибиз, гьаракатчы ва бажарывлу тайпаланы алдына тогъас салмай иш гёрюв агьамиятлы. Ёгъесе, ачыкъ кюйде иш гёреген далапчылар яшыртгъындан – тюпден таба юрюлеген экономикагъа бойсынма муштарлы болагъанын заман ачыкъ этип гёрсете.
Яшырмагъа тарыкъ болмай. Гьалиги заманда, умуми кюйде алгъанда, экономика тармакъда иш гёрегенлени 60-70 процентлеге ювугъу тийишли пачалыкъ къурумларда гьисапгъа алынмай, оьз пайдалары учун чалыша.
Шо да гьар тюрлю бюджетлеге гелеген къошумланы алдына чатакъ сала ва республикабызны экономикасын уьстден берилеген дотациялагъа харлы эте.
Шону учун гьали-гьалилерде Россияны Гьукуматыны Председатели Михаил Мишустин далапчылыкъ тармакъда юрюлеген гьар тюрлю тергевлени къадарын кемитмеге тюшегени гьакъда пачалыкъ маълумат къуралланы къуллукъчуларына оьз пикруларын малим этген.
Шогъар байлавлу болуп тёбенде «Ёлдашны» охувчулары учун ДР-ни далапчылыкъ ва инвестициялар комитетини башчысы Артём Хрюкин де шулай баянлыкъ эте.
– Гертиден де, гьалиги заманда пачалыкъны ва халкъны пайдаларын якълап чалышагъан далапчылыкъ булан машгъул болагъан тайпаланы алдына чатакъ салмай, ерли гьакимлик ва тергевлер этеген къурумлар олар булан байлавлукъда англатыв ишлени генглешдирмеге тюше. Неге десегиз, жазалавгъа бойсынмай, англатыв ишлени юрютювге тергевню артдырыв агьамиятлы ва пайдалы.
Белгили болгъан кюйде, асувлу ишни ёрукълашдырыв регионланы ва регионлардагъы муниципал къурулувларындагъы прокуратураланы къуллукъчуларына борч болуп салына. 2021-нчи йылда алдагъы йылдан эсе савлай Россияда далапчылыкъ тармакъда оьтгерилеген тергевлер планлашдырылмай, эки керен кем болгъан.
Гележекде де шо ёрукъда иш гёрмек учун бизин агентлик далапчыланы ихтиярларын якълайгъан къурум булан байлавлукъда иш гёрмеге токъташгъан.
