Дагъыстан Россияны оьзге регионлары булан тенглешдиргенде авлакъланы сугъармагъа ва шолай да къоллавчуланы ичеген сув булан таъмин этмеге айрыча байлыкълары булан белгили. Сув байлыкъларыбызны пачалыкъны ва халкъны онгайына пайдаландырмакъ учен ерли имканлыкълар некъадар яшавгъа чыгъарыла?

– Дагъыстан Темиркъазыкъ-Кавказ федерал округунда лап да кёп ватандашлар яшайгъан уллу республикаланы бириси. Кёп адам яшайгъан ерде оланы агьамиятлы талапларын кютювге де айрыча тергевню бакъдырмагъа тюше, – деди прес-конференциясында ДР-ни къурулуш, архитектура ва ЖКХ министерлигини башчысы Артур Сулейманов. – Яй вакътилерде адамланы ичеген сув булан таъмин этив четимлешегени алдагъы йылларда йимик гьали де ачыкъ болуп гёрюне. Шону алдын алмакъ учун бугюнлерде «Чиркей-Буйнкск», «Гьайдакъ-Дербент», «Чиркей-Магьачкъала-Каспийск» деген уьч аслу проектлер яшавгъа чыгъарыла. Шо бир гюнлюк масъала тюгюл.

Шоланы биринчиси «Таза сув» деген федерал проектни оьлчевюнде къурулуп тура ва бу йылны ахырына таба байдаландырывгъа бермеге гёз алгъа тутулгъан. Ишлер 30 чакъырымда тамамлангъан ва дагъы да узатылып тура. Дагъы да ачыкъэтип айтгъагъанда, сув объектни 70 проценти ишленип битген. Эсгерилген чакъы узунлукъда сув сакълайгъан къуюлар да гьазирленгени гьакъда айрыча эсгермеге тюше.

Озокъда, ишлер сув линияны Буйнакскиге ерли етишдирген булан битмей. Къоллавчуланы разилигин къазанмакъ учун шагьарны ичиндеги сув юрюйген быргъыланы ярашдырыв-янгыртыв ишлерден де хантав къалмагъа тюшмей.
Ичеген сувну къытлыгъы бугюнлерде Избербаш, Магьачкъала, Буйнакск, Каспийск шагьарларда яй айларда ачыкъ болуп гёрюне. Шону учун бизин республикабызгъа ял алмагъа гелеген Каспийни ягъасындагъы ял алыв ерлеге де сув гелтирмек учун муниципал къурулувларына къошум чаралар гёрмесе, артагъан талапланы толу кюйде яшавгъа чыгъарма четим.

«Гьайдакъ-Дербент» сув линия «Развитие СКФО» деген пачалыкъ программагъа гёре къурулуп тура. Шону да 2024-нчю йылда битдирмеге умут этилине. Мунда да ишлени 70 процентге ювугъу кютюлген демеге ярай. «Чиркей- Магьачкъала-Каспийск» деген уьчюнчю лап да аслу проектде ишлер кёп. Дагъысын айтмагъанда, сув быргъыланы 80 чакъырымгъа ювукъ узунлукъда тартмагъа тарыкъ болажакъ.

-Каспийск шагьарны ювугъундагъы «Чабакъ кёлден» Избербаш шагьаргъа да бутакъ алынажагъы гьакъда прес-конференцияда ортакъчылыкъ этген «Избербаш шагьар» деген муниципал округуну башчысыны заместители Нариман Рабаданов да айрыча баянлыкъ берди. Шогъар байлавлу ишлер де графикде гёрсетилинген болжалдан алда юрюй.