Белгили къумукъ улан Арсланбек Магьмутов Канададагъы Шавиниган деген шагьарда немис боксёр Михаэл Валлиш (Майкл Уоллиш) булан гезикли ябушувун оьтгерди. 37 йыллыкъ Михаэл Валлиш –2015-2016-нчы йылларда Европаны чемпиону болгъан, 22 керен ябушгъан ва шоланы 16-сын утгъан.
Арсланбек Русланович Магьмутов 1989-нчу йылда Моздок шагьарда тувгъан. 14 йыллыкъ чагъындан берли тутушуп ябушув, сонг бокс булан машгъул бола. Уллу авурлукъда ябушагъан спортну халкъара устасы Арсланбек Магьмутов 2009-нчу йыллардан берли студентлени арасында Европаны ва дюньяны чемпиону болгъан. 2014-нчю йылда Азербайжанны кубогун къазангъан.
Боксну эки тюрлю къайдасында – Американы чемпиону. Дюньяда уллу авурлукъда ябушагъан 20 адамны арасында касбучу даражада 16 керен ябушгъан, барысын да утгъан, шоланы 15-вюн нокаут булан тамамлагъан.
2017-нчи йылда Арсланбек Магьмутов Eye of the Tiger хас компания булан дыгъар байлагъан ва гьали Канадада Монреаль шагьарда яшай ва спорт булан машгъул. Белгили спортчулар Артур Бетербиев, Элейдер Альварес ва Давид Лемьё булан бирге ону да Марк Рэмси уьйрете, сынавун камиллешдире.
2022-нчи йыл 16-нчы декабрде болгъан ябушувунда 90,7 кило авурлукъда ябушагъан Арсланбек Магьмутов биринчи минутлардан башлап чапгъын этип турду. Шоланы уьчевю нокдаунт деп гьисапланды. Огъар къаршы ябушагъан Михаэл Валлиш бир-эки керен тийгенде, бетин яшырып иелип турду. Шону учун да бир-бир керенлерде Арсланбекни юмурукълары елкесине тийди. Михаэл Валлиш Арсланбек боксда гери урулгъан къайдада ябуша деп кант этме къарады, сонг инбашы авуртгъан деп багьана этип, 1-нчи раунддан сонг ябушмады.
Ябушувгъа къарама жыйылгъан халкъ шону ушатмады ва къаршылыгъын къычырыкълар ва сызгъырывлар булан гёрсетди. Судья Арсланбек Валлишни елкесине ура деп буварыв этди, тек утгъан деп Арсланбекни къолун гётерди. Шо ябушувну артында тренери Марк Рэмси Арсланбекге ябушув шолай дагъы давам этилсе, ону тайдырып къоймакълыкъ барны билдирди.
Арсланбек Магьмутов бу гезик нигериялы Рафаэл Акпеджори булан ябушма герек эди, тек ол ахырынчы гюнлерде гери урду.
Биз къумукъ уланыбыз Арсланбекни бу утушун да гьакъ юрекден къутлайбыз ва огъар дагъы да оьрлюклер ёрайбыз!
