Арадан 25 йыл оьтюп тутулгъан

Россияны Ахтарыв комитетини Дагъыстан ахтарыв управлениесинде айрыча сакъланагъан документлер бар. Шолар – хыйлы йыллар алдын болгъан жинаятчылыкълар булан байлавлу протоколлар. Тек нечакъы заманлар гетсе де, айыплылар тутулагъан гезиклер аз болмай. Муна бугюнлерде де ахтарывчулар 25 йыл алъякъда Магьачкъалада турагъан адамгъа къаршы ачылгъан уголовный ишни судгъа бакъдыргъан.

Ахтарывчулар токъташдырагъан кюйде, 1998-нчи йылны июн айыны 17-синде 21 йыллыкъ жагьил адам гюндюз вакъти Магьачкъалада Толстойну атындагъы орамда ерлешген «Экмек» деген тюкенге гирип, сатывчу къатынгъа бир нече керен бичакъ уруп яралагъан. Сонг тюкенни кассасындан 1500 манат урлап къачгъан. Жинаятчы тез тутулгъан. Суд-экспертизаны къарары булан ону республиканы психиатрия диспансерине бакъдыргъанлар. Тек арадан нече ай оьтюп, медицина идарадан къачма бажаргъан.

2022-нчи йыл болгъунча къардашыны паспорту булан Калуга ва Брянск областларда яшынып тургъан. Гьали чи оьзюн ахтарагъан бирев де ёкъдур деп ойлашып, Интернетде суратын ерлешдирген. Полицейскийлер жинаятчыны шо суратгъа гёре тапгъан ва Дагъыстангъа етишдирген.
Уголовный ишге ювукъ арада Магьачкъаланы Совет район судунда къаралажакъ.

Авторизация
*
*
Регистрация
*
*
*
Согласны с условиями сайта?
Генерация пароля