Биринчи оюнну «Анжи» «Шериф» булан ничьягъа ойнаса да, оьзюню подгруппасында, группа турнир битгинче дагъы да бир тур къалса да, Европа лиганы ярым финалында ойнамакъны къазанды. Оьзю оюн эки де команданы чапгъынлары булан оьтдю. Биринчи тайм – 0:0. Экинчи таймны элли экинчи минутунда «Шерифни» чапгъынчысы Исмайыл Иса, оьзюню командасыны чапгъынларыны бирисинде бизин Кержаковну къапусуна топ гийирип, оюнну санавун ачды. Арадан беш минут гетип, «Анжини» орта якълавчусу, угловойну натижасында башы булан уруп, «Шерифни» къапучусун да пашман этди.
Оюнну санаву 1:1 болгъан сонг, «Анжини» футболистлери, бизге группадан чыкъмагъа шо ничья таманлыкъ этегенни де билип, оьзлени къапусуна тартылып,оюнну санавун сакъламакъны гьайын этип молдаванланы чапгъынларын гери ура башлады. Шолай оюн да битди...
Экинчи оюнда турнир таблицаны ахырынчы еринде мекенли къайдада ерлешген «Анжини» гьалын къаравчулар яхшы биле эди. Бизден хыйлы йыракъгъа гетмеген (он дёртюнчю ер, он эки очко булан) Томьну оьзюбюзню майданыбызда утмагъа тарыкъ экени, бизин футболистлерибизден къайры, шо гюн футболгъа къарагъан кимге де мекенли зат эди. Тек «Анжи» оюнну 69 процент заманында топну да оьзлерде сакълап, токътамайлы, пайдасыз чапгъынлар да этип, «Томьну» къапусуна токъсан минутну ичинде, он сегиз керен урма да уруп, азында, уьч-дёрт къоркъунчлу мюгьлетни де къолдан чыгъарып, къонакълардан гьар тайм оьз­лени къапусуна бирер топ да алып, оюнну утдурду! «Томь» Дагъыстангъа гелип «Анжиге» эки гол да гийирип гетди.
Къаравчулар, командагъа ва баш тренерибиз Гьажи Гьажиевге къарсалап, Анжи Аренаны трибуналарын рази­сизлик аваздан толтурду. Муна он сегизинчи тур битди, «Анжи» буса гьали де бир команданы да утмагъан. «Анжибиз» терен къуюгъа тюшген, бу йыл шондан чыгъып бажарар деп мени эсиме гелмей.
Оюн битген сонг бары да журналистлер, прес-конференция залда олтуруп, Гьажи Гьажиевни кёп узакъ къаравуллады. Гьажиев яхшы гечигип гелип, салам да берип: «Мен гьали сизин булан сёйлеме болмайман, мен гелгенмен сизге де, къаравчулагъа да менден гечигиз деп тилеме... Мен бугюн мени командам гёрсетген оюндан уяламан», – деп, атылып туруп залдан чыгъып гетди. Журналистлер де къалды гьариси оьзюню ою булан. Тюзюн айтсам, мени шо адамгъа языгъым да чыкъды...

Шарабутдин Кишиев.
Суратда: Сердер Сердеров.