Денисов, Жирков ва Кокорин оюн башлангъынча эки гюн алда москвалы «Динамо» булан, Олег Шатов буса «Зенит» булан дыгъарлагъа къоллар да салып, «Анжиден» гетип , бизге къаршы токътайгъан командаланы оюнчулары болуп токътады. Олардан къайры, Габулов, Диара, Виллиан, Самба, Буссуфа башгъа-башгъа командалагъа гетме сююп, оюнда чы къайдагъы затдыр, бирлери тренировкаларда да ёкъ эди. Санкт-Петербургда шу эсгерилген футболистлерден янгыз Габулов гёрюндю, о да артгъа салгъан футболистлени арасында.

Шу макъала язылгъынча гьалиге Буссуфа да Москваны «Локомотив» командасына гетди. Бугюн болмаса тангала Диара, Виллиан ва Самба да гетегени белгили. Уьчюсюн де оюнгъа къуршама иштагьлы Россиядан ва башгъа тыш пачалыкълардан къарап тургъан нече де командалар бар.

Сулейман Керимов команданы аслу футболистлерин шу гьалда, тезлик булан сатма токъташгъаныны багьанасын толу кюйде гьали де бирев де билмей.

Санкт-Петербургда «Зенит» булан оюнгъа да бизин баш тренер Гьажи Муслимович Гьажиев тюнегюнгю (жагьил), «Анжини» экинчи составында ойнайгъан футболистлени чыгъарды. Бизин экинчи состав оюнну башында яман да гёрюнмей эди, тек «Зенит» айтылгъан футболистлери булан «Анжини» енгме болду. Оюнну йигирма бешинчи минутунда Роман Широков, къыркъ дёртюнчю минутда Халкъ, етмиш еттинчи минутунда, бу йыл Къазан шагьарны «Рубин» командасындан «Зенитге» чыкъгъан Кристиан Ансальди «Анжини» къапучусу Михаил Кержаковгъа уьч топ гийирди. «Анжини» аслу футболистлери оьзлеге къошулгъанлар булан бир де ойнамагъан. Шо саялы футболистлер бир-бирине уьйренип битмегени гёрюне эди.

Гьали «Анжи» турнир таблицаны он бешинчи сыдырасында токътады. Гелеген оюнун Краснодар команда булан бу айны йигирма дёртюнде «Анжи-Аренада» ойнажакъ. Мен ойлашагъан кюйде, команданы герти якълавчу- къаравчулары шулай онгайсыз гьалгъа тюшген командагъа арт бермей, дагъы да гючлю кюйде оланы якълап, хошун гётерип, бизин дагъыстанлы жагьил футболистлени гёнгюн алма тюше.