Алдагъы гюнлерде Серпухов шагьарында WBA къуруму оьтгерген турнирни оьлчевюнде гезикли ябушув ярыш болду. Эсгерилген шо тогъатартывну барышында Олимпия оюнланы чемпиону Альберт Батыркъазиев Панамадан гелген Хесреэл Корралес булан ёлукъду. Ябушувну тогъузунчу тиретинде оьзю булан тогъатартмагъа чыкъгъан спортчудан бизин спортчу уьст гелди.

Тюзю, ябушувну биринчи тиретини ортасына етишип турагъанда Альберт Батыркъазиев оьзю булан тогъатартагъан кочапгъа ургъанда, мекенли кюйде темтиреп, лавлап гетип, ол бир башлап чёгеленип къалса да, тез эс табып, аякъгъа турмагъа болду. Тек Альберт Батыркъазиев ябушувну гезикли тиретлеринде майданчада онгайлы кюйде ерлешип, оьзю булан тогъатартмагъа чыкъгъан кочапны къувуп, тарлыкъгъа салып турду. Ябушувну тогъузунчу тиретинде буса, ол бирдагъы да мекенли кюйде темтиреп, лавлап гетгенде, Хесреэл Корралесни тренерлери тогъатартывну токътатмагъа борчлу болду.
Оьтгерилген шо ябушув Альберт Батыркъазиев касбучу спортчуланы арасында оьтгерген сегизинчи тогъатартыв болуп токътады. Шо гьакъда айта туруп, ол шоланы барысын да утгъанын айрыча эсгермеге тюше.