Абурдан тюшген касбу

Пачалыкъ Дума гьаманда йимик, оьтген янгурну артындан ямучу алып чабагъандай, школаларда энниден сонг загьмат тарбиялав болмаса ярамай, охувчуланы пайдалы ишлеге къуршама тарыкъ деген ойгъа гелген ва шону булан байлавлу «Билим беривню гьакъындагъы» федерал законгъа бир тюрлю къошумлар этмеге хыялы бар. Балики, тюз ойлар, таклифлер буса да ярай, депутатланы кёбюсю совет школаны битдирген ва шо заманлар юрюлеген загьматны дарсларын унутуп битмегендир.

Тек оланы сиптечилиги булан арагъа чыкъгъан закон проектге байлавлу бир тюрлю соравлар да тувулунмай къалмай.

Мисал учун, пайдалы иш деген не ишдир? Депутат Байсолтан Гьамзаев де айтгъанлай, школаны директоруну дачасында яшлар картоп къазмакъмы яда анадаш билим берив ожагъыны гьар гюн полларын жувмакъмы?...   Биздеги гьаллагъа къарагъанда, шо да болмайгъан зат тюгюл.

Озокъда, уьлкени оьр къурумларыны бириси оьсюп гелеген яш наслуну гьакъында ой къурагъаны, гьайын этме къарайгъаны нечакъы да яхшы. Амма депутатлар закон гьалиги кююнде къабул этилинсе, шону яшавгъа чыгъарывда хыйлы четимликлер тувулунажагъын англама тарыкъ эди.

Яшлагъа «Аслу затланы гьакъындагъы лакъырлар» деген дарсны къошгъан. Биринчи сентябрден тутуп асгерге башлапгъы гьазирлевню де уьйренме башлажакъ. Гьали оьзге пайдалы ишлени де таклиф этелер. Охув программагъа бир затны къоша бусагъыз, не затны кемитме, аз этме сюесиз деген соравгъа жавап табылмай.

Загьмат булан тарбиялав, загьматгъа гьюрмет этив деп къычырыкълы сёзлер айтыла, тек телевизордан буса гече де, гюн де не гёрсетиле? Шонда сиз бир сама загьматны адамына багъышлангъан берилишлени гёремисиз? Чебер фильмлени чи айтма да айтмайман.

Бугюнгю школаланы, билим беривню аслу къыйыны ЕГЭ-лер де, загьмат тарбиялавлар да тюгюл. Совет Союз тозулгъан сонг, уьлкеде муаллимлик деген касбуну абуру тюшген. Эгер де биз шо абурну, гьюрметни къайтарып болсакъ, школа булан байлавлу оьзге масъалалар да оьз ёругъу булан чечилежек эди. Инг алдын, бизин яшлагъа билим береген касбучуланы биревге де харлы болмасдай тийишли алапасы болмагъа тюше ва оланы къайдагъы маънасыз кагъыз иш булан инжитмеге тарыкъ тюгюл.

Гьалиги наслуну чу билмеймен, тек мени чагъымдагъылар биринчи муаллимин бир де унутмай. Ол сени эсделик хуржунунгда абуруна гёре уллатанг,уллананг, атанг-анангдан сонг гелеген адам буса да ярай. Шолай гьис мени торунларымда да тувулунгъанны сюемен ва депутатлагъа муаллимлени абурун къайтарыгъыз деп чакъырыв этемен!