Къумукъ тил ва  адабият дарсланы муаллимлерини методика бирлешивюню ёлбашчысы Н. Сапиева, ана тиллени жумалыгъы оьтгерилген кюйню тындырыкълы кюйде сёйледи. Гьар муаллим оьзюню охувчулары булан бирликде юрюлюп турагъан ишни яхшы натижалары барны аян этип эсгерди.

Байрамны программасын юрютеген муаллим З. Тобурова биринчи класны охувчу къызы Асият Казимовагъа сёз бере. Ол да, къолунда къурчакъ мишиги булан ортагъа чыгъып, «Бишев» ва «Биринчилер» деген шиъруланы чебер кюйде гёнгюнден айта. 6-нчы класны охувчу къызы Залина Магьамматова муаллими де булан бирге халкъ асарлагъа асасланып, оьзлер язгъан «Беш къызардаш» деген хабарын таъсирли кюйде охуп чыкъды.

Ана тил дарсланы муаллимлери З. Тагьированы, Ж. Уллубиеваны, Н. Аташеваны, Н. Сапиеваны, Р. Атаеваны ёлбашчылыгъы булан охувчу яшлар гьар тюрлю спектакллерден алып, оьзлер оьзтёрече гьазирлеген сагьна гёрюнюшлени уста кюйде ойнап, къаравчуланы тазза къурчун къандырып турдулар.

Юрт китапхананы къуллукъчусу Салимат Валиюллаева да ана тилни байрамына оьзтёрече къошумун этди. Ол китап ва сурат выставкаланы гьазирлегенден къайры, къаравчуланы алдына чыгъып асил ана тилибизни гьакъында таъсирли сёзлер айтды, шиърулар охуду.

Байрамны инг гьаракатчы ортакъчыларына школаны дирекциясыны атындан грамоталар берилди.

К. КАЗИМОВ.