Ростовдагъы къыбла асгер судда дагъыстанлы Сааду Агьматнабиевни уголовный ишине къаралгъан.

Судгъа бакъдырылгъан материаллагъа гёре, С.Агьматнабиев 2015-нчи йылны октябр айындан тутуп, 2017-нчи йылны май айына ерли сахават гьаракатны юрютемен деген багьана булан, Россияда гери урулгъан «Ислам пачалыгъы» деген террорчу къурумгъа 8 миллион манат бакъдыргъан. Суд ону РФ-ни Уголовный кодексини 205-нчи статьясына гёре, 16,5 йылгъа эркинликден магьрюм этмек деген къарар чыгъаргъан.
Белгили кюйде, Сааду Агьматнабиев Исрайыл Агьматнабиевни иниси бола.

Бизин маълумат: Исрайыл (Абу Умар Саситли) Цумада районну Янгы Саситли деген юртунда тувгъан. Атасы Сайитагьмат 9 йылны узагъында ерли юрт советге башчылыкъ этген. Юртдагъы орта школаны битдиргенде, Исрайылны Сириядагъы «Абу Нур» деген институтгъа къабул этгенлер. 2015-нчи йылда «Мухаджирун» деген жамият къурумну атындан Сириягъа жагьил дагъыстанлыланы бакъдырма башлагъан. Оьзюне уголовный иш ачылгъанда, Тюркиягъа къачгъан. Гьали миллетини бир яны бусурманлыкъны юрютеген Нигерияда (Гюнбатыш Африка) тура.