Дагъыстанны экономикасын оьсдюрювню кюрчю ёлларын ахтарывгъа ва пайдаландырывгъа артдагъы йылларда айрыча тергев бакъдырыла. Неге десегиз, гючлю беклешген экономикасыз агьамиятлы яшавлукъ масъалаланы ёрукълашдырыв четимлеше.

Бугюнлерде «Дагъыстан» деген маълумат агентлигинде республикабызны журналистлери булангъы ёлугъувунда ДР-ни экономика ва ерли территорияланы оьсдюрюв министерлигини башчысыны къуллукъларын заманлыкъгъа кютеген Адильхан Агьматов арагъа салынгъан масъалагъа гёре генг кюйде англатыв берди ва шогъар байлавлу болуп тувулунгъан кёп къадардагъы соравлагъа жаваплар къайтарды.

– Дагъыстанны экономиксын оьсдюрювню аслу ёлларыны хас прграммасын къабул этивге байлавлу болуп касбучуланы, ахтарывчу алимлени арасында генг кюйде гьакълашыв юрюлдю ва шону натижасында къабул этилген проект ДР-ни Халкъ Жыйынына тасдыкъ этмек учун таклиф этилинди, – деп башлады оьзюню баянын Адильхан Агьматов. – Халкъ Жыйынны депуталары да эсгерилген проектни арагъа салып 2030-нчу йылгъа ерли къабул этди.

Буссагьатгъы вакътиде бизин республикабызда яшавгъа чыгъарылагъан федерал ва регион програмаланы арасында «Ерли сиптечилик» деген милли борчну агьамиятллыгъы гьакъда айрыча эсгермеге сюемен. Эсгерилген проектни оьлчевюнде буса дагъыстанлы къоллавчуланы ичеген сув булан толу кюйде таъмин этив бугюнню аслу масъаласы гьисапда айрыча хат булан гёрсетилген.

Гертиден де, гьалиги заманда бизин республикабызда агьамиятлы проектлени арасында «Мени Дагъыстаным – мени сувларым» «100 школа», «Мени Дагъыстаны – мени ёлларым» лап да агьамиятлылары санала.

«Ерли сиптечилик» деген программагъа гёре аслу тергев де къоллавчулар учун онгайлы яшавлукъ-коммунал къуллукъланы болдурувда, ярашдырыв ишлени камиллешдиривде белгиленген борчлар яшавгъа чыгъарыла. Буссагьатгъы вакътиде Дагъыстанда эсгерилген проектде 42 район ва шагьар муниципал къурулувлары ортакъчылыкъ эте. Шоланы 37-синде буссагьатгъы вккътиде борчлар да яшавгъа чыгъарыла ва онгайлыкълар пайдаландырывгъа бериле.
Ерлерде шолай онгайлыкъланы бодурувда пачалыкъ программалардан, ерли гьакимлик къурулувларындан ва шолай да мадарлы тайплардан да харж булан къошум этилине.

Уьстде де эсгерилгени йимик, буссагьатгъы вакътиде бизин республикабызда «Ерли сиптечилик» деген проектни оьлчевюнде яшавгъа чыгъарылагъан борчланы 30-зу «Мени Дагъыстаным – мени сувларым» ва шолай да «Таза сув» деген регион ва федерал программалар булан байлавлу.