Дагъыстанны экономикасын оьсдюрювню кюрчю ёлларын ахтарывгъа ва пайдаландырывгъа артдагъы йылларда айрыча тергев бакъдырыла. Неге десегиз, беклешген экономикасыз агьамиятлы яшавлукъ масъалаланы ёрукълашдырыв четимлеше.

Бугюнлерде «Дагъыстан» деген маълумат агентлигинде республикабызны журналистлери булангъы ёлугъувунда ДР-ни экономика ва ерли территорияланы оьсдюрюв министерлигини башчысыны борчларын заманлыкъгъа кютеген Адилхан Агьматов арагъа салынгъан масъалагъа гёре генг кюйде англатыв берди ва шогъар байлавлу болуп тувулунгъан кёп къадардагъы соравлагъа жаваплар къайтарды.

– Дагъыстанны экономикасын оьсдюрювню аслу ёлларыны хас программасын къабул этивге байлавлу болуп касбучуланы, ахтарывчу алимлени арасында генг кюйде гьакълашыв юрюлдю ва шону натижасында къабул этилген проект ДР-ни Халкъ Жыйынына тасдыкъ этмек учун ­таклиф этилинди, – деп башлады Адилхан Агьматов. – Халкъ Жыйынны депутатлары да эсгерилген проектни арагъа салып 2030-нчу йылгъа ерли къабул этди.

Буссагьатгъы вакътиде бизин республикабызда яшавгъа чыгъарылагъан федерал ва регион программаланы арасында «Ерли сиптечилик» деген милли борчну агьамиятлыгъы гьакъда айрыча эсгермеге сюемен. Эсгерилген проектни оьлчевюнде буса дагъыстанлы къоллавчуланы ичеген сув булан толу кюйде таъмин этив бугюнню аслу масъаласы деп айрыча хат булан гёрсетилген.
Гертиден де, гьалиги заманда бизин республикабызда агьамиятлы проектлени арасында «Мени Дагъыстаным – мени сувларым» ,«100 школа», «Мени Дагъыстаным – мени ёлларым» дегенлери лап да агьамиятлылары санала.

«Ерли сиптечилик» деген программагъа гёре аслу тергев де къол-лавчулар учун онгайлы яшавлукъ-коммунал къуллукъланы болдурувда, ярашдырыв ишлени камиллешдиривде белгиленген борчлар яшавгъа чыгъарыла. Буссагьатгъы вакътиде Дагъыстанда эсгерилген проектде 42 район ва шагьар муниципал къурулувлары ортакъчылыкъ эте. Шоланы 37-синде бугюнлерде борчлар да яшавгъа чыгъарыла ва онгайлыкълар пайдаландырывгъа бериле.

Ерлерде яшавлукъ онгайлыкъланы болдурувда пачалыкъ прог-раммалардан, ерли гьакимлик къурулувларындан ва шолай да мадарлы тайпалардан да харж булан къошум этилине.
Уьстде де эсгерилгени йимик, буссагьатгъы вакътиде бизин рес-публикабызда «Ерли сиптечилик» деген проектни оьлчевюнде яшавгъа чыгъарылагъан борчланы 30-у «Мени Дагъыстаным – мени сувларым» ва шолай да «Таза сув» деген регион ва федерал программалар булан байлавлу.