Кёмек къолубузну узатайыкъ
Ер юзюнде аламат арив ерлер кёп бар. Къаягент районда Каспий денгизни боюнда Инчхе деген темир ёл станциядан район центр Янгыкъаягентге элтеген автомобиль ёлну ва денгизни арасындагъы табиаты оьтюп барагъанланы тергевюн тарта. Ёлну онг боюнда «Къаягент» деген ГУП-ну топуракъларында ва далапчылагъа гёрсетилген ерлерде юзюм бавлар ерлешген. Избербашдан чыкъгъан шо ёл булан оьзюм де Янгыкъаягентге ишге бараман.
Уьстде эсгерилеген мундагъы аривлюк адамланы гьаракаты булан тюгюл, Яратгъаныбызны къудуратындан гелген. Мунда къушланы ва жан-жаныварланы тавушлары кёп. Къушланы, жаныварланы дюньясын гёрмеге, билмеге, уьйренмеге мунда гьар йыл элибизни Москва, Краснодар, Санкт-Петербург шагьарларындан алимлер гелелер. Бираз ариде, 1000 гектар ерде, Аччы кёл ерлешген. Кёл ва ону айланасы къушлар ял алагъан, уялар тигеген ва артагъан ер болуп къалмай, Гюнбатыш-Каспийден къыблагъа учагъан къушланы ери де дюр. Гьар йыл язбашда мундан къушланы миллионлар булан 70-ден кёп журалары къыблагъа уча ва гюз айларда къайтып гете.
Бай табиатны бу оьтесиз арив ерлерин охувчу яшлар, бизин яш наслулар гёргенин сюебиз. Аччы Папас кёл ва ону айланасы кёкню тюбюнде ерлешген табиат бизге берген жанлы музей отав болуп къала. Бу ерлени гёрген биринчи гюнлеримден тутуп, районну школаларында болгъан гезиклеримде мен муаллимлеге, айрокъда табиат булан байлавлу иш юрютеген биологлагъа охувчу яшланы къыдырма гелтирмекни, ачыкъ дарслар оьтгермекни арив гёрегенимни айтаман. Олар таклифлериме рази болалар. Кёплери мунда яшланы алып да гелелер.
Тек не этерсен, уьстде суратлангъан бай табиатны, къушланы къысматына тувулунгъан къоркъунчлу гьал булан байлавлу. Шо къоркъунчлукъ да адамлардан тувула. Айтагъаным, туризмни оьсдюрюв масъалаланы чечебиз деп, биревлер денгиз бойлагъа гьар тюрлю авур техниканы да тартып, сарихум тёбелени тегишлейлер, ял алагъанлар учун уьйлер тигелер, ёллар къуралар.
Ишлер булай къайдада юрюлсе, биз ювукъ арада табиатны байлыкъларын толумлашдырагъан къушланы, жан-жаныварны гёзел дюньясындан айрыл масбызмы?! Оланы гележеги уллу къоркъунчлукъда. Аллагьыбыз, табиат бизге берген бу аламатлыкъланы тас этмеге сюймейбиз. Гелигиз, барыбыз да биригип, тийишли республика ва ерли муниципал къурумланы тергевюн тартып, бу масъаланы тюз ёрукъгъа салмагъа, тийишли даражада чечмеге гьаракат этейиклер!