Абакар – гьаракатчы касбучу

 

 

Юрт ерлерде клублар маданият яшавну ярыкъ очагъы болуп токътай. Амма кёбюсю юртларда клубланы биналары талам-такъыш болуп тозулгъан. Маданият ожагъы булан макътанып болагъан юртлар аз бар . Люксембург юртну алсакъ, бу якъдан тюзелген деп айтмагъа болабыз.  Дейгеним, бу юртда клубну бинасы сакълангъан. Шонда 150  адам сыягъан жыйынлар оьтгереген залы да, сагьна да бар.

 

Клуб  болгъан булан да битип къалмай. Клубну башын тутуп, гече демей, гюн демей, яллыкъ билмей, халкъ булан къыйышып ишлеп бажарагъан маданият къуллукъчу да герек бола. Люксембургда юрт клубну башын тутгъан Абакар Баширович Гьажимуратов – лап шолай адам. Ишин де оьтесиз сюеген, къаны-жаны булан янашагъан касбучу. Ол шо ишде ишлейгенли 35 йылгъа ювукъ бола.

Абакар Гьажимуратов 1961-нчи йылда Люксембург юртда тувгъан. Юрт  школаны битдирип, загьмат ёлун колхозда учётчик болуп башлагъан. Заманы гелип, асгерде къуллукъ этмеге чакъырылгъан. Ватандаш борчун кютюп, 1982 нчи йылда ата юртуна къайта. Арадан заман оьтюп, ачыкълашдырып  айтгъанда, 1985-нчи йылда хас охув ожакъны тамамлап,  ол къолуна зоотехникни дипломун ала. Шо йылларда школада биология дарсланы юрютеген муаллимлер болмагъан саялы, юрт школаны директору тилеп, биология дарсланы муаллими гьисапда ишлеме ала.

Амма къайда ишлесе де, Абакарны юреги маданият тармакъгъа тарта болгъан. Ол гиччиден йырламагъа да, бийимеге де, музыка алатлар сокъмагъа да гьюнери булан оьсген улан. 1990-нчу йылда ол оьзю юреги авуп маданият тармакъда чалышма башлай. Айтагъаным, шо йыл Абакарны юртдагъы клубну директору этип белгилей. Ишден айырылмагъан кюйде ол Магьачкъала шагьардагъы Г. Гьасановну атындагъы музыка училищени де охуп битдире.

Шо гюнлерден тутуп, ол ата юртну маданият яшаву сёнмесин учун ол кёп гьаракат эте. Бажарывлугъуна бажарывлукъ, жаваплыгъына жаваплыкъ, пагьмусуна пагьму къошуп чалыша. Юрт клубда генг кюйде гьар тюрлю байрам мажлислер оьтгере . Бир байрам тархны да унутмай. Абакар оьзюню ишинде биревни де тергевюз къоймай. Гезиги гелгенде, уьйлерине барып савгъатлар да тапшура. Гьар йыл янгы йылны алдында охувчу яшлар учун ёлка да салып, яшланы гёнгюн ала. Яшлар да байрамдан сююнюп, оьзлер билеген йырланы йырлай, шиърулар охуй ва къурч кюйде бийип де алалар.

Люксембург юртдан бугюнлерде Украина бойда юрюлеген хас асгер гьаракатда ортакъчылыкъ этеген уланлар кёп бар. Оланы агьлюлерин де Абакар тергевсюз къоймай, татлиликлер ва емишлер булан оланы уьйлерине барып байрамлары булан къутлай. Абакар Гьажимуратов районда биринчилей болуп хас асгер гьаракатда ортакъчылыкъ этеген уланланы суратлары булан арив безендирилген стенд этип, лап да уллу тамгъа илген.

– Бугюнлерде бизин уланлар  парахатлыгъыбызны къоруп сакълай, – дей Абакар. – Шолай болгъанда, биз оланы алдында борчлубуз. Биз олар булан оьктем болабыз. Олар бизин яш наслугъа уьлгю болуп токътай. Ватанны, юртун, халкъын нечик сюйме ва асырап сакълама герекни гёрсете. Уьстюнлюк къазанып, эсен-аман ожакъларына къайтмакъны уланлагъа ёрайман.

Яз-яй айларда юртгъа йыравлар концертлер, Къумукъ театрны артистлери спектаклер алып гелелер ва олай да  оьзге шатлы чаралар оьтгериле. Абакар оьзю башына алгъан ишге бир де уьсденсув янашмагъан. Берген сёз ерде ятмагъа герекмейгенни ол яхшы биле. Айтгъан сёз – атылгъан  окъ деп негьакъ айтылмай. Абакар – гьар заманда да сёзюнде табылагъан бажарывлу ва пагьмулу къуллукъчу.

– Мени ишимде онг къолум болуп юртну гьакимбашы Мурат Къадыров токътай. Гьар тилегимни бир де гери урмай, айтгъандокъ сеслене. Гезиги гелгенде, кёмек къолун да узата. Маданият яшав сёнсе, юрт да сёнегенни ол яхшы англай. Юртну жанландырагъан ва ругьун гётереген маданият чы. Ругь азыкъ да инсангъа герек чи. Ругь береген буса – маданият, адабият ва инчесаният.

Абакар Гьажимуратовну сёзлерин бирев де инкар этип болмас.

Абакарны касбу пагьмусу,  маданиятны оьсювюне ва халкъ арада генг кюйде  этеген гьаракаты жавапсыз къалмагъан. Ол кёп санавдагъы гьюрметлев грамоталагъа, дипломлагъа, баракалла кагъызлагъа ва оьзге савгъатлагъа ес болгъан.

Ишинде  йимик, агьлюде де  ким де сукъланардай тизив ожакъ къурмагъа болгъан. Яннавурундагъы агьлюсю Салигьат булан уьч яшны тарбиялагъан, олагъа мугькам билимлер алмагъа имканлыкълар яратгъан. Эки къызы Орёл ва Кисловодск шагьарлардагъы медучилищелени битдирип, Хасавюрт шагьарда яшайлар. Касбусуна гёре медсестралар болуп ишлейлер. Уланы да оьр билимлеге ес болуп, Магьачкъала шагьарда яшай ва ишлей.

Шо кюйде юртда маданият ожакъны отун сёндюрме къоймагъан Абакар Гьажимуратовгъа ишинде оьрлюклер ва уьстюнлюклер булан бирге юрекге тутгъан бары да муратларына етишмекни ёрайбыз.

 

Бэлла ГЬАЖИГЕЛДИЕВА,

Россияны журналистлени союзуну члени.

СУРАТДА:

А. ГЬАЖИМУРАТОВ.

 

Авторизация
*
*
Регистрация
*
*
*
Согласны с условиями сайта?
Генерация пароля